''Qalatasaray''da Mustafa Məhəmədlə bağlı problem nəhayət yoluna qoyuldu.

Bilindiyi kimi İstanbul nəhəngi misirli forvardı 2020/21-in qış fasiləsində ''Zəmələk''dən icarəyə götürmüşdü. Məhəməd ilk aylarda yaxşı və məhsuldar oyun sərgiləsə də, ötən mövsümü istənilən səviyyədə keçirməmişdi. Buna baxmayaraq ''Cim-Bom'' ötən ilin dekabrında onu daimi əsasda heyətə qataraq 2025-ci ilə qədər müqavilə imzalanmışdı. Amma bu keçidin qarşılığında ''Zəmələk''ə 4 milyon dollar ödənilməli idi. Son tarix 1 iyul idi. Misir klubu həmin tarixə qədər pulu almadığından ''Qalatasaray''a ayın 12-nə qədər vaxt verdi və bundan sonra FİFA-ya şikayət edəcəyini bildirdi. Amma iş şikayətə qədər çatmadı.

''Sarı-qırmızılar'' dünən 4 milyon dolları qarşı tərəfin hesabına köçürdülər. 24 yaşlı forvard indiyə qədər ''Qalatasaray''da forma geydiyi 57 rəsmi oyunda 17 qol, 5 məhsuldar ötürmə ilə yadda qalıb.