''Qalatasaray'' iki futbolçu ilə yollarını ayırmağa hazırlaşır. Söhbət Mbaye Dianye və Olimpiu Morutsandan gedir. Dianye dünən Avstriya toplanışını tərk edərək ''Fatih Karagümrük''lə danışıqlar aparmaq üçün İstanbula qayıdıb. Morutsan isə böyük ehtimalla qarşıdakı mövsümü icarə əsasında ''Sivasspor''da keçirəcək. Sivaslıların baş məşqçisi Rza Çalımbay onun xidmətində çox maraqlıdı. Bu oyunçuların komandadan ayrılacağını baş məşqçi Okan Buruk da təsdiqləyib: ''Dianyeyə rəsmi təklif gəldi. Əlimizdə 3 hücumçu var idi. Onun oynamaq şansı o qədər də çox olmayacaqdı. Bu üzdən təklifi dəyərləndirmək qərarına gəldi. Morutsan isə bizim üçün önəmli oyunçudu. Ona görə böyük pullar ödəmişik. Amma daimi oynamağa ehtiyacı var. Bəlkə də bir mövsüm başqa klubda oynasa, sonradan bizə daha güclü şəkildə dönəcək''. 30 yaşlı Dianyenin 2,4 milyon avroluq illik məvacibinin ''Qalatasaray''la ''Fatih Karagümrük'' arasında yarıbayarı ödəniləcəyi gözlənilir. Xatırladaq ki, Dianye ''Qalatasaray''a 2019-un yanvarında 13 milyon avroya ''Kasımpaşa''dan transfer olunub. İlk mövsümdə vacib qollar vuran və çempionluqda mühüm rol oynayan seneqallı hücumçu sonrakı mövsümlərdə qeyri-sabit çıxış edərək başqa klublara icarəyə verildi. Bu müddətdə o, ''Brügge'' və ''Vest Bromviç''də icarə əsasında çıxış etdi. Ötən mövsüm isə İstanbul nəhəngində 22 rəsmi oyuna cəmi 4 qol vura bildi. Morutsan isə ötən ilin avqustunda 3,5 milyon avroya transfer olunub. Beşillik müqaviləyə imza atan rumıniyalı vinger ilk mövsümdə Türkiyə futboluna alışmaqda çətinlik çəkərək ümidləri doğrulda bilmədi. O, 33 qarşılaşmada yalnız 3 qol, 5 məhsuldar ötürmə ilə yadda qaldı.