Hər ötən gün Mauro İkardini ''Qalatasaray''a bir qədər də yaxınlaşdırır.

Football-plus.az xəbər verir ki, Avropada artıq ''transfer pəncərəsi'' bağlanıb. Türkiyədə isə ''pəncərə'' sentyabrın 8-də bağlanacaq. Türkiyə mətbuatının yazdığına inansaq, ''Qalatasaray'' rəhbərliyi məhşur argentinalı forvardın keçidi üçün apardığı danışıqlar prosesində ciddi irəliləyişə nail olub. Fürsətdən istifadə edərək bir ara ''Fənərbaxça'' da İkardiyə maraq göstərdi. Amma deyilənə görə 29 yaşlı futbolçu bu mövsümü icarə əsasında ''Qalatasaray''da keçirməyə razılıq verib. Transferin detallarına gəlincə, ''Cim-Bom'' İkardinin 8,2 milyon avroluq illik maaşının 3,5 milyon avrosunu ödəməyi öhdəliyinə götürüb. PSJ rəhbərliyi müqaviləyə 30 milyon avroluq daimi əsasda transfer maddəsini də salmaq istəyirdi. İstanbul nəhəngi bu təklifi rədd etdi. Yəni İkardi bir mövsümlük Türkiyə macərasının ardından Parisə qayıtmalı olacaq. Hətta onun ən qısa müddətdə İstanbula gələcəyi və bazar ertəsi baş tutacaq ''Qaziantep''ə qarşı oyunu tribunadan izləyəcəyi də iddia olunur.

Xatırladaq ki, Mauro PSJ-yə 2019-cu ildə ''İnter''dən icarə əsasında transfer olunub. Bir il sonra Paris nəhəngi 50 milyon avro ödəyərək futbolçu ilə dördillik müqavilə imzaladı. Ümumilikdə İkardi PSJ-də keçirdiyi 92 rəsmi oyunda 38 qol, 10 məhsuldar ötürmə ilə fərqlənib. ''Transfermarkt''ın versiyasına görə onun indiki dəyəri 22 milyon avrodu.