Qış transfer dönəmində ''Sassuolo''dan Kaan Ayhanı heyətinə qatan ''Qalatasaray'' indi də hücumu gücləndirmək niyyətindədi.

Football-plus.az xəbər verir ki, komandaya heç cür uyğunlaşa bilməyən Haris Seferoviç nəhayət ''Cim-Bom''u tərk etmək üzrədi. Türkiyə mətbuatının yazdığına inansaq, təcrübəli forvard ikinci dövrədə ''Kasımpaşa''nın şərəfini qoruyacaq. Baş məşqçi Okan Burukun planlarına daxil olmayan digər əcnəbi futbolçu Patrik van Anholt da özünə yeni klub tapıb. Artıq komanda yoldaşları ilə vidalaşaraq vətəninə yollanan niderlandlı müdafiəçi mövsümün sonuna qədər icarə əsasında PSV-də çıxış edəcək.

''Qalatasaray''ın yeni hədəfi isə Luka Yoviçdi. İstanbul nəhəngi serbiyalı forvardı mövsümün sonuna qədər icarəyə götürmək istəyir və bunun üçün artıq ''Fiorentina''ya rəsmi təklif irəli sürüb. Danışıqlar davam edir. 25 yaşlı futbolçunun Florensiya klubundakı karyerası o qədər də parlaq keçmir. Yoviç bu mövsüm 27 rəsmi oyuna cəmi 7 qol vurub. Bilindiyi kimi ulduzu ''Ayntraxt''da parladıqdan sonra Yoviç 2019-da 65 milyon avroya ''Real''a transfer olunmuşdu. Amma həmin vaxtdan bu yana onun karyerasında eniş yaşanmağa başladı. Madrid nəhəngində ümidləri doğrulda bilməyən futbolçu əvvəlcə icarə əsasında ''Ayntraxt''a qayıtdı və ötən yay ''Real'' onu pulsuz ''Fiorentina''ya buraxdı. Bu məsələdə ''Qalatasaray''ın lehinə olan iki məqam var. Birincisi, Seferoviç ilə Yoviç eyni menecerlik şirkətinə məxsusdu.

Yəni ''Qalatasaray''ın artıq həmin şirkətlə əlaqəsi var. İkinci məqam isə Yoviçin özünün kluba simpatiyasının olmasıdı. Sosial şəbəkələrdə uzun müddətdi ''Qalatasaray''ı təqib edən serbiyalı futbolçu klubla bağlı edilən paylaşımları tez-tez ''layk'' etməsi ilə diqqət çəkir. Fanatlar son 2 gündə Yoviçin səhifələrinə hücum edərək onu durmadan İstanbula dəvət etməyə başlayıblar.