Türkiyənin son çempionu “Qalatasaray”la bağlı transfer xəbərləri var.

"Football-plus.az" xəbər verir ki, ilk xəbər Mustafa Məhəməd ilə bağlıdı. Bilindiyi kimi, müqavilə ilə “Cim-Bom”a məxsus olan misirli forvard geridə qoyduğumuz mövsümü icarə əsasında “Nant”da keçirmişdi. 25 yaşlı hücumçu bu klubda 51 rəsmi oyunda meydana çıxaraq 11 qol, 4 məhsuldar ötürməlik performans sərgiləmişdi. Məhəmədi daimi əsasda transfer edə bilmək hüququnu da əlinə keçirən fransızların bu hüquqdan yararlanıb-yararlanmayacağı sona qədər də bəlli deyildi. Amma “Nant” Məhəmədin performansından razı qalaraq onu birdəfəlik transfer etdi. Bunun qarşılığında “Qalatasaray” 5,75 milyon avro qazandı. İcarə haqqı kimi “Nant”ın ötən yay 250 min avro ödədiyini də nəzərə alsaq, İstanbul nəhəngi bu satışdan ümumilikdə 6 milyon avro gəlir əldə etdi.

Xatırladaq ki, “Zəmələk”dən transfer edilən Məhəməd “sarı-qırmızılar”a 5,5 milyon avroya başa gəlmişdi.

Digər xəbər Kaan Ayhanla bağlıdı. Bilindiyi kimi, “Qalatasaray” təcrübəli futbolçunu son mövsümün qış fasiləsində “Sassuolo”dan 400 min avroya icarəyə götürmüşdü. İcarə müddəti 6 aylıq idi. Amma müqaviləyə xüsusi maddə salınmışdı. Belə ki, “Aslan” çempion olacağı təqdridə Kaan daimi əsasda transfer olunmalı və onunla 3 illik müqavilə imzalanmalı idi. Artıq bu maddə qüvvəyə minib. Futbolçunun atası Erol Ayhan Kaanın birdəfəlik “Qalatasaray”a transfer olunduğunu təsdiqləyib. Bunun üçün klubun büdcəsindən daha 2,8 milyon avro çıxıb. Yəni bu transfer İstanbul nəhənginə ümumilikdə 3,2 milyon avroya başa gəlib. Müdafənin istənilən mövqeyində oynamağı bacaran 28 yaşlı universal futbolçu hələ ki özünü “Qalatasaray”da göstərə bilməyib. Mərkəzdə Əbdülkərim Bardakcı ilə Viktor Nelssonun uğurlu oyunu onun əsasən ehtiyatda qalmasına səbəb oldu. Amma yeni mövsümdə Kaanın daha çox şans qazanacağı gözlənilir. Həm də Avropa klublarının hədəfində olan Nelssonun Türkiyədən ayrılmaq ehtimalı böyükdü.
Amma indi camiəni ən çox narahat edən mövzu hücumçu qıtlığıdı. Düzdü, hər kəs Mauro İkardidən xəbər gözləyir. Bazar ertəsi Ərdən Timur İtaliyada İkardi və onun meneceri Vanda Nara ilə görüşərək onlara klubun son təklifini irəli sürəcək, eləcə də qarşı tərəfin şərtlərini dinləyəcək. Amma hər kəs İkardini gözləyərkən qızıla bərabər vaxt gedir. Komandanın vaxtı isə elə də çox deyil. “Qalatasaray” cəmi 10 gündən sonra – iyunun 27-də yeni mövsümün hazırlığına start verəcək. Bundan təxminən 1 ay sonra – iyulun 25-26-da “Cim-Bom” Çempionlar Liqasının 2-ci təsnifat mərhələsində ilk oyununu keçirəcək. Bafetimbi Qomisin də ayrıldığını nəzərə alsaq, hazırda Okan Burukun əlinin altında hücumçu kimi oynaya biləcək cəmi iki oyunçu – Nikolo Zanyolo ilə Barış Alpər Yılmaz qalıb. Üstəlik onların heç birinin əsas mövqeyi mərkəz hücumçusu deyil! Fanatlar artıq indidən vahiməyə düşməyə başlayıb. Onlar ikinci “Östersun” faciəsinin yaşana biləcəyindən çəkinirlər. Bu arada məlum olub ki, Zanyolonun da komandanı tərk etmək ehtimalı var. “Yuventus” başda olmaqla İtaliya nəhəngləri ona ciddi maraq göstərir. “Qalatasaray”la hələ dördillik müqaviləsi olan ulduz futbolçunun təzminatı 35 milyon avrodu. “Yuventus” Zanyolonun əvəzinə istanbullulara amerikalı Uinston Makkenni ilə 15 milyon avri təklif edib. “Qalatasaray” rəhbərliyi artıq hücum üçün alternativ variantlara yönəlib. Gündəmdə olan isimlər “Lion”dan ayrılan Mussa Dembele, “Atalanta”dan ayrılmaq istəyən Duvan Zapata və “Çelsi”nin gələcək planlarına daxil olmayan Pyer-Emerik Obameyanqdı. Əslində Dembelenin meneceri ilə artıq neçə müddətdi gizli danışıqlar aparılır. Amma azad agent statusunda olan 26 yaşlı futboluya maraq göstərən klubların sayı çoxdu. Bu üzdən Dembelenin maaş tələbi də yüksəkdi. 34 yaşına girmək üzrə olan Obameyanqla da danışıqlar davam edir. Okan Buruk bu transferə razılığını verib. Amma maddi şərtlərlə bağlı məlumat yoxdu.