''Beşiktaş''la bağlı transfer xəbəri var. İstanbul nəhəngi həm heyətini bir yeni oyunçu ilə gücləndirib, həm də bir futbolçu ilə vidalaşıb.

"Football-plus.az" xəbər verir ki, baş məşqçi Şenol Günəşin tələbi ilə gənc vinger Əmrəcan Bulut heyətə daxil edilib. 20 yaşlı futbolçu ilə ''4+1'' illik müqavilə imzalanıb. Bu futbolçu buna qədər əsasən aşağı liqa klublarında forma geyib. ''Əmrə Bələdiyəspor''da yetişən, daha sonra ''Karaköyspor''da oynayan Əmrəcan ötən mövsümü 2-ci liqa, yəni 3-cü divizion təmsilçisi ''Somaspor''da keçirmiş və oyunu ilə diqqət çəkmişdi. O, 34 rəsmi oyunda 16 qol, 1 məhsuldar ötürmə ilə fərqlənmişdi. ''Beşiktaş''dan ayrılan futbolçu isə Tayfur Bingöldü. 30 yaşlı sağ müdafiəçi zatən ''ağ-qaralar''da icarə əsasında oynayırdı. 1 illik ''Beşiktaş'' macərasının ardından o, müqavilə ilə məxsus olduğu ''Alanyaspor''a qayıdıb. Tayfur geridə qoyduğumuz mövsüm 34 rəsmi oyuna çıxaraq 2 qol, 2 məhsuldar ötürməlik performans sərgilədi.

Onu da bildirək ki, Burak Yılmazın ''Beşiktaş''ın məşqçilər korpusuna daxil olması rəsmən öz təsdiqini tapıb. Dünən komanda yeni mövsümün hazırlıqlarına start verib. Şenol Günəş Yılmazı öz köməkçisi kimi futbolçulara təqdim edib.