İngiltərənin 1-ci liqasında, yəni 3-cü divizionda çıxış edən ''Ekseter Siti''nin heyətində bu mövsüm maraqlı və hətta dramatik hadisə yaşanıb.

Əvvəlcə bildirək ki, 2010-cu ilin avqustunda bu klubun üzvü Adam Stensfild 31 yaşında xərçəng xəstəliyindən dünyasını dəyişmişdi. Bu futbolçu 2006-10-cu illərdə ''Ekseter Siti''də top qovaraq 160 oyuna 39 qol vurmuşdu. Bu hadisədən sonra rəhbərlik bu futbolçunun şərəfinə ''9 nömrə''ni əbədiləşdirmək qərarına gəlmişdi.

"Football-plus.az" xəbər verir ki, uzun illər klubda bu nömrə heç kimə verilməsə də, ötən yay vəziyyət dəyişdi.

Bu klub Adam Stensfildin oğlu Cey Stensfildi yetirməsi olduğu ''Fulhem''dən birillik icarəyə götürərək ona atasının nömrəsini verdi. 20 yaşlı forvard mövsümü heç də pis keçirmədi. Ötən həftəsonu isə mövsümün son oyununda Cey Stensfild ''Morkam''ı 3:2 hesabı ilə yendikləri qarşılaşmada het-trik etdi.

Yəni o, atasının xətrinə əbədiləşdirilən nömrə ilə ''Ekseter Siti''nin həyətindəki son oyununda 3 qol birdən vurdu. Cey Stensfild 74-cü dəqiqədə fanatların böyük alqış sədaları altında əvəzləndi. Gənc futbolçu mövsümü 9 qolla tamamladı.

ƏLİ