13 illik fasilədən sonra ''Real''ın baş məşqçisi postuna qayıtmağa yaxın olduğu üçün hazırda dünya futbolunda ən çox müzakirə edilən məşqçilərdən olan Joze Mourinyo ilə bağlı maraqlı bir xəbər var.

Ünlü portuqaliyalı mütəxəssisin Türkiyə Futbol Federasiyasından Avropa İnsan Haqları Məhkəməsinə (AHİM) şikayət etdiyi məlum olub! Məlum olduğu kimi Mourinyo 2024/25-də ''Fənərbaxça''da çalışıb. Həmin vaxt o, Türkiyə futbolu ilə bağlı tez-tez qalmaqallı açıqlamalar verdiyi üçün müxtəlif cəzalarla üzləşirdi.

Görünür, 2024-ün noyabrında aldığı cəza Mourinyonun yaddaşında daha dərin iz buraxıb. O həmin vaxt ''Trabzonspor''la oyundan sonra mətbuat konfransında işlətdiyi sözlərə görə Nizam-İntizam Komitəsi tərəfindən müəyyən müddətə səlahiyyətlərinin icrasından məhrum edilmiş və bir neçə yüz min lirə para cəzası almışdı. ''Fənər'' bu qərara etiraz etsə də, Apellyasiya Komitəsi NİK-in qərarını qüvvədə saxlamışdı.

İndi 63 yaşlı mütəxəssis məhz həmin cəzanı misal gətirərək Türkiyədə futbol komitələrinin müstəqil olmadığını və məşqçilərin söz azadlığının əlindən alındığını bildirib! Mourinyo bununla da kifayətlənməyib. Portuqaliyalı cəzanın səbəbinin ona yazılı şəkildə çatdırılmadığını və bu üzdən ədalətli şəkildə özünü müdafiə etmək haqqının əlindən alındığını bildirib.

Maraqlıdı ki, AİHM məşqçinin şikayətini qəbul edib və TFF-dən məsələ ilə bağlı izahat istəyib. Federasiyanın özünü müdafiə etmək və lazımi sənədləri hazırlamaq üçün 6 ay vaxtı var.

Xatırladaq ki, ''Fənər'' Mourinyonun dönəmində 62 rəsmi qarşılaşma keçirib və orta hesabla hər oyuna 2,02 xal toplayıb. Əslində bu, yetərincə yüksək göstərici hesab olunsa da, bilindiyi kimi, Mourinyo yerli məşqçilərin hegemonluğuna son qoya bilmədi və ''Qalatasaray'' Okan Burukla növbəti çempionluğunu qazandı.