"Komanda sayının çox olması nisbətən zəif ölkələrin də turnirdə iştirakına şərait yaradır. Amma bir tərəfdən bu qaydanın tətbiqində əsas mahiyyət pul da ola bilər. Çox oyun çox pul deməkdi. Futbolu pula çeviriblər. Bu səbəbdən də futbol mənfi yöndə irəli gedir. Heç kim inanmazdı ki, Braziliya Almaniyaya 1:7 uduzar. Avropa ölkələri dünya çempionatında çoxluq təşkil edir. Bu da say, rəqabət nisbətində özünü göstərir. Braziliya yığmasının fanatıyam. Azarkeşliyə gəlincə, bu il Braziliya ilə yanaşı, Türkiyəyə də azarkeşlik edəcəm. "Ay-ulduzlular" da  Azərbaycan millisi kimi öz komandamızdı. “Sambaçılar”dan Neymarın, Türkiyədə isə Arda Gülərin oyununu çox bəyənirəm".

"İştirakçı sayının artırılmasının nə dərəcədə effektli qərar olduğuna çempionat bitəndən sonra qiymət verə bilərik. Dünya böyükdü. Futbol qloballaşıb. Bu baxımdan FİFA-nın qərarını təbii sayıram. 48 ölkənin olması çempionatı daha da rəngarəng edəcək. FİFA və UEFA-nın qərarları həmişə ilk vaxtlar etirazla qarşılanır. Amma sonra baxırsan ki, doğru qərar veriblər. Fikrimcə, bu addım da özünü doğruldacaq. Çempionatın ilk oyunlarından sonra hansı qitənin millilərinin ön planda olduğu üzə çıxacaq. Gözləntilərimə görə, kubok Avropada qalacaq. Hər hansı milliyə xüsusi azarkeşlik etmirəm. Türkiyə və Özbəkistan yığmalarına milli təəsübkeşlik yönündə can yandırmaq olar. Futboldan zövq almaq lazımdı. Türkiyə millisinin heyətində futbolçuların əksəri bərabər səviyyəli bacarıqlara malikdi. Arda Gülərlə Kənan Yıldız başqalarıyla müqayisədə xüsusi fərqlənir. Türklərin qrupu da zəif deyil. Qrupdan çıxmaq heç də asan olmayacaq. Türkiyə millisinin heyəti ən azı 1/8 finala qədər irəliləməyə imkan verir".