Son mövsümdə uğursuz çıxış edən, avrokuboklara vəsiqə qazana bilməyən “Araz-Naxçıvan” əvvəlcə ukraynalı baş məşqçisi Andrey Demçenko, ardından 10 futbolçu ilə vidalaşdı.

Bu futbolçular arasında Bəxtiyar Həsənalızadə də var. Təcrübəli müdafiəçi ilə söhbətdə bəzi suallara cavab tapmağa çalışdıq.

- "Araz-Naxçıvan"ın heyətindəki oyununu necə qiymətləndirirsən?
- İlk gəldiyim il daha uğurlu idi. Düşünürəm ki, "Araz-Naxçıvan"da karyeram ümumilikdə yaxşı alındı. Həmişə komanda üçün əlimdən gələni etmişəm. Meydanda qələbə qazanmaq üçün bütün gücümü ortaya qoymuşam.

- Bəs "Araz-Naxçıvan"ın son mövsümdəki çıxışı haqda fikrin necədi?
- Birinci dövrənin yekununda avrokuboklara vəsiqə baxımından müəyyən şanslarımız var idi. İkinci dövrədə isə həmin şansı əldən verdik. Zəif təsir bağışladıq. Turnir cədvəlindəki yerimiz vəziyyəti izah edir.

- Amma komanda ötən mövsüm avrokuboklara vəsiqə qazanmışdı, hətta mərhələ adlamağı da bacarmışdı. Bu mövsüm həmin heyətdə elə bir ciddi dəyişiklik də baş verməmişdi. Bəs komandanın belə geriləməsinə səbəbi nədi?
- Səbəbin nə olduğunu tam bilmədik. Hər komandada eniş olur. Bu mövsüm də eyni hal bizim başımıza gəldi. Məğlubiyyətlər yaşadıq, xallar itirdik və avrokuboklar uğrunda mübarizədən qopduq.

- Elmar Baxşıyevin Andrey Demçenko ilə əvəzlənməsi nə dərəcə doğru qərar idi?
- Bu haqda nəsə deyə bilmərəm. Rəhbərliyin verə biləcəyi qərardı.

- "Araz-Naxçıvan"ın sənlə yolları ayırmasına nə səbəb oldu?
- Müqaviləmin müddəti başa çatdı və uzadılmadı. Nəticədə ayrılmalı oldum.

- Başqa klublardan təklif varmı?
- Təklif var. Hələ ki qərar verməmişəm. Menecerlər vasitəsilə əlaqədəyəm. Danışıqlar prosesi gedir. Ən uyğun variantı seçməyə çalışıram.

- Bir müddət "Tuzlaspor"da legioner həyatı yaşayıbsan. Yenidən belə addım atmağın mümkündü?
- Legioner həyatı da istisna deyil. Uyğun təklif gələrsə, o da mümkündü.

- Milli komandaya dəvət almayıbsan. Bunun səbəbi nədi?
 - Milliyə dəvət almağı mən də çox istəyirəm. Lakin bu təkcə mənim istəyimlə bağlı məsələ deyil. Niyə çağrılmadığıma dair məlumatım yoxdu. Qərarı məşqçi heyəti verir. Hər bir qərara da hörmətlə yanaşıram.

MURAD ABDULLAZADƏ