Hakan Safi ilə Əziz Yıldırım arasındakı gərgin rəqabətin nəticəsi bu gün bəlli olacaq.

Görünən odu ki, Hakan Safi açıqladığı möhtəşəm transferlərlə bir addım önə keçib. Tanınmış iş adamı daha öncə ''Sportinq''in qol silahı Luis Suaresin, Türkiyə yığmasının üzvü Merih Dəmiralın və ''Marsel''in ingiltərəli vingeri Meyson Qrinvudun transferini açıqlamışdı. Daha doğrusu, bütün bu futbolçular yalnız Hakan Safi prezident seçiləcəyi təqdirə ''Fənərbaxça''ya gələcək. Əziz Yıldırımın isə bu oyunçular gündəmində deyil. Əksinə Yıldırıma ''HT Spor'' kanalının canlı yayınında Safinin anlaşdığı oyunçularla bağlı sual ünvanlanıb və o ''mən bunların anlaşdıqları Merih Dəmiralı heç vaxt almaram'' cavabı ilə diqqət çəkib.

Bu arada Hakan Safi seçkilər ərəfəsində növbəti ''bombanı partladıb''. Onun Hakan Çalhanoğlu ilə bütün məsələlərdə prinsipial razılıq əldə etdiyi məlum olub! Türkiyə yığmasının kapitanı və ''İnter''in ulduzu uzun müddətdi, ''Qalatasaray''ın hədəfində idi. Elə o özü də uşaqlıqdan ''Qalatasaray'' azarkeşi olduğunu heç vaxt gizlətməyib. Ötən yay Çalhanoğlu ''Cim-Bom''a keçməyin biraddımlığında olsa da, transfer son anda baş tutmamışdı. Hakanın meneceri də ''Fənər''lə anlaşdıqlarını təsdiqləyib. Türkiyə mətbuatının yazdığına inansaq, tərəflər ''3+1'' illik anlaşma əldə edib.

Beləliklə, Safi prezident seçilsə, 32 yaşlı tanınmış futbolçu da ''Fənərbaxça''ya transfer olunacaq. 2021-dən bu yana ''İnter''in şərəfini qoruyan və bu klubla iki dəfə A seriyası çempionluğunu qazanan Çalhanoğlu geridə qoyduğumuz mövsümdə 30 rəsmi oyunda iştirak edərək aktivinə 12 qol, 7 məhsuldar ötürmə yazıb.