Ardıcıl 4 çempionluqla Türkiyə futbolunda özünə məxsus olan rekordu təkrarlayan ''Qalatasaray'' yeni mövsümün planlarını cızır. Dedi-qodulara baxmayaraq Okan Burukun ayrılmayacağı dəqiqdi.

Bu arada məşqçilər korpusu ilə bağlı yeni iddia ortaya atılıb. Belə ki, ''Qalatasaray''ın sabiq üzvü Dris Mertens məşqçilər korpusuna daxil olaraq Burukun köməkçilərindən birinə çevrilə bilər. Mertens məlum olduğu kimi ''Qalatasaray''ın Okan Buruk ilə qazandığı ilk 3 çempionluqda pay sahibi olmuş, Türkiyə karyerasında 136 rəsmi oyuna çıxaraq 25 qol, 44 məhsuldar ötürməlik performans sərgiləmiş və ötən yay karyerasını başa vurmaq qərarına gəlmişdi.

Deyilənə görə ''Qalatasaray'' rəhbərliyi məşqçilər korpusunun yenilənməsi və Mertensin dəvət olunması məsələsi üzərində ciddi baş sındırır. Özü də nəzərə alaq ki, bu günlərdə Okan Burukun ispaniyalı köməkçisi İsmael Qarsiya öz vətənində verdiyi açıqlamada artıq özünü baş məşqçi kimi sınamaq istədiyini bildirib.

Yəni onun bu yaxınlarda ''Qalatasaray''dan ayrılması sürpriz olmayacaq. Mertens məhz onun yerini tuta bilər.