DÇ-2026-ya qatılacaq bütün komandaların iştirak ərizəsi bəllidi. Yəni hansı liqaların və klubların mundiala daha çox futbolçu göndərməsi ilə bağlı statistika artıq mövcuddu. Bəribaşdan qeyd edək ki Azərbaycanı dünya çempionatında yalnız bir futbolçu - ''Turan Tovuz''un panamalı müdafiəçisi Roderik Miller təmsil edəcək. ''Sabah''ın özbəkistanlı yarımmüdafiəçisi Umarali Raxmonaliyev isə son anda mundialdan kənarda qaldı. Bəs digər çempionatlar?

Öncə vurğulayaq ki, bəzi mənbələrdə rəqəmlər üst-üstə düşməyə bilər. Çünki başqa yerə yollanan və icarədə oynayan futbolçuların klubları fərqli cür qəbul edilə bilir. Amma istənilən halda bu məqam premyer-liqanın hegemonluğunu dəyişmir. İngiltərə çempionatı bu göstəricidə 3-4-cü pillələrdə qərarlaşan Liqa-1 ilə La Liqanı az qala iki dəfə üstələyir!

DÇ-2026-ya ən çox oyunçu göndərən çempionatlar

Premyer-liqa - 154
Bundesliqa - 93
Liqa-1 - 78
La Liqa - 74
A seriyası - 66
Səudiyyə Ərəbistanı Pro Liqası - 47
MLS - 44
Türkiyə superliqası - 42
Çempionşip - 37
Eredivizya - 30

Mundialda premyer-liqanı 35 fərqli ölkədən olan ümumilikdə 154 futbolçu təmsil edəcək. Təsəvvür edin, premyer-liqanın 20 klubunun hər birinin (!) heyətində DÇ-də çıxış edən ən azı bir futbolçu var. Dünyanın başqa heç bir çempionatı belə göstərici ilə öyünə bilməz. Hətta İngiltərənin səviyyəcə ikinci turniri olan çempionşip belə DÇ-yə ən çox oyunçu göndərən çempionatlar arasında ilk ''10-luq''dadı. Bu da bir daha İngiltərə klub futbolunun dünya futbolundakı önəmini və nüfuzunu ortaya qoyur.

Ümumilikdə İngiltərə təmsilçilərin mundiala 200-dən çox oyunçu göndərib. Hətta son mövsümdə 5-ci diviziondan 6-cı diviziona geriləyən ''Breyntri Taun''da belə Yeni Zelandiyanın heyətində yer alan Tommi Smit çıxış edir. “Skuadra adzurra”nın DÇ-yə vəsiqə qazanmamasına baxmayaraq, İtaliyanın hələ də ilk ''5-lik''də qərarlaşması diqqəti çəkir. A seriyasında çıxış edən 20 klubdan 18-nin mundialda təmsilçisi olacaq. ''Böyük beşlik'' bu göstəricidə də hamıdan öndədi. Dərhal sonra Səudiyyə Ərəbistanı (47) və ABŞ (44) çempionatları qərarlaşıb.

Qeyd edək ki bu iki ölkə belə desək, şəxsi rekordunu yeniləyib. İndiyə qədər bu ölkələrdən heç vaxt DÇ-yə bu qədər çox futbolçu yollanmamışdı. Yeri gəlmişkən, Səudiyyə Ərəbistanı yığmasının iştirak ərizəsində yer alan 26 futbolçudan 25-i yerli çempionatda çıxış edir. Yerli çempionatı yığmada bu dərəcədə böyük rol oynayan digər DÇ iştirakçısı Qətərdi. Cənubi Afrika çempionatını DÇ-də 19 futbolçu təmsil edəcək və bunların hamısı bir yığmanın heyətində yer alıb. İran, Misir və Çexiya liqalarının da yığmada xüsusi payı çox böyükdü.
Bəs klublarda vəziyyət necədi? Burda lider ''Mançester Siti'' ilə ''Bavariya''dı. Sonrakı pillələrdə Çempionlar Liqasının son finalçıları - PSJ ilə ''Arsenal'' qərarlaşıb.

Klublarla bağlı siyahıda ''Kristal Pelas''ın yuxarı pillələrdə qərarlaşması cəlbedici məqamdı. London təmsilçisi mundiala 12 futbolçu göndərib və bu göstəricidə hətta ''Liverpul'' (11), ''Real'' (10) və ''Çelsi'' (8) kimi nəhəngləri də qabaqlayıb. 2022-də 3-cü divizionda oynayan ''Sanderlend'' həm avrokuboklara vəsiqə qazandı, həm də mundiala 9 futbolçu göndərməsi ilə öyünə bilər.

DÇ-2026-ya ən çox oyunçu göndərən klublar
Mançester Siti - 19
Bavariya - 18
Arsenal - 16
PSJ - 16
Barselona - 15
Mançester Yunayted - 12
Kristal Pelas - 12
Atletiko - 12
Əl-Hilal - 12