Dünya futboluna damğa vurmuş mütəxəssislərdən biri olan 76 yaşlı Fabio Kapello “Milan”ın saytlarından birinə klubda yaşananlarla bağlı müsahibə verib.

Kapellonu bu klubun əfsanələrindən biri adlandırmaq olar. O, məşqçi kimi 1990-cı illərin əvvəllərində “Milan”la 4 çempionluq, 1 ÇL daxil olmaqla 9 titul qazanıbsa, futbolçu kimi də “rossonyerlər”in heyətində 1978/79-da çempionluq sevinci yaşayıb. “Milan”dan başqa Kapello “Real”, “Roma”, “Yuventus”u, eləcə də İngiltərə və Rusiya yığmalarını çalışdırıb.

- Hazırda “Milan”ın heyətində ciddi itkilər var. Onlardan biri qapıçı Mayk Menyandı. Komanda onsuz nəticə qazanmağı bacaracaq?
- Menyan həqiqətən də çox ciddi itkidi. Çünki xaraktercə liderdi. Onun meydanda olması müdafiə xəttini də ruhlandırır. Baldır əzələsinin zədələri aldadıcı olur. Çünki özüm də bunu yaşamışam və nə demək olduğunu bilirəm. Adama elə gəlir ki, sağalmaq üzrəsən. Amma bir cəld hərəkət edən kimi ağrılar yenə başlayır. Ümid edirəm ki, Menyan Çempionlar Liqasının pley-offuna qədər sağalacaq.

- Teo Ernandes və Olivye Jirunun dünya çempionatındakı performansı barədə nə düşünürsüz?
- Jiru əla formadadı. Hiss olunurdu ki, mundialın finalında erkən əvəzləndikdən sonra çox qəzəblənmişdi. Amma ümumi götürəndə Jiru turniri yüksək səviyyədə keçirdi. Teo da tam qaydasındadı və dərhal komandaya kömək edə biləcək gücdədi. Jiru qədər olmasa da, Ernandesin də mundialı yaxşı keçirdiyini düşünürəm. Sadəcə alışdığı kimi oynaya bilmirdi. Bəzən sıxıntı yaşayırdı. O cinahda Mbappe qərarlaşdığından hücumlara tam olaraq istədiyi kimi qoşula bilmirdi. Amma əvəzində müdafiədə diqqətli olmağa çalışırdı. Bu da vacib məqamdı. DÇ-ni bir imtahan kimi götürsək, Teonun bu imtahandan keçdiyini söyləmək olar.

- Rafael Leaonun müqaviləsi ilə bağlı məsələ hələ də aktuallığını qoruyur. Onun müqavilə müddəti 2024-də başa çatır. Bu vəziyyətdə həm kluba, həm də oyunçuya nə məsləhət verərdiz?
- Açıq danışsaq, Leao indiki səviyyəyə çatdığına və bu cür tanınmış oyunçuya çevrildiyinə görə yalnız “Milan”a borcludu. Bunu nəzər almalı və kluba minnətdar olmalıdı. Donnarumma kimi etməməlidi! Yox, futbolda minnətdarlıq artıq yoxdusa, bu başqa məsələ. O zaman deyə biləcəyim bir söz yoxdu. Leaonun “Milan” üçün nə dərəcədə vacib futbolçu olduğunu hər birimiz bilirik. Hərçənd o, son mundialda nəyə qadir olduğunu tam göstərə bilmədi.

- De Ketelaredən də fanatlar çox şey gözləyir. Ümidləri doğrultması üçün nə etmək lazımdı?
- De Ketelare sanki bir qədər özün itirib. Bəzi anlarda düzgün qərarlar vermir. Əslində o, topa sahib olduqda çox şey etmək istəyir. Sadəcə bir qədər ləng düşünür və davranır.

- Məşqçi karyeranızda bu cür problemlə qarşılaşmısız?
- Əlbəttə. Sadəcə, sakit, səbirli olmaq və bir qədər gözləmək lazımdı. Biz, adətən, bu cür səviyyədəki oyunçuların bu problemini məhz belə yoluna qoyurduq.

- Təzyiq də öz sözünü deyir. Onu futbolçunun üzərindən götürmək üçün nə etmək lazımdı?
- Burda ilk növbədə onun nəyi düzgün və yaxşı etdiyini müəyyənləşdirmək lazımdı. Gördün ki, nəyisə yaxşı edir, həmin şeyi daha da yaxşı etməsi üçün ona yardım etmək lazımdı. Futbolçuya başa salmaq lazımdı ki, bu hələ başlanğıcdı. Amma problemin psixologiya ilə bağlı olub-olmadığını da müəyyənləşdirmək lazımdı. Futbolçu psixoloji problem yaşayırsa, ona başqa çarə tapmaq lazımdı. Çünki o, meydana qorxaraq çıxır...

- Bu yay komandaya qoşulan futbolçulardan daha çox şey gözləmək düzgündümü? Çünki Orici, Adli, Tşau və Vranks kimi yeni futbolçular demək olar oynamır.
- Oricinin zədələrdən başı açılmır. Nə vaxt baxırsan, zədəlidi. Məşqlərdə iştirak etməyən və komandanın içində olmayan oyunçu haqda nə demək olar? Digərləri isə hər gün məşqçinin gözü önündə olur. Məşqçi onların son durumunu hamımızdan yaxşı bilir. Hər bir məşqçi komandaya faydalı ola biləcəyini düşündüyü oyunçuları start heyətində meydana buraxır. Yəni bu artıq Piolinin səlahiyyətindədi. Onun qərarını müzakirə etmək düzgün deyil. Bir futbolçu məşqdə digərindən – hər zaman oynayan oyunçudan güclü olduğunu sübut edə bilirsə, deməli meydana məhz o çıxacaq. Güclü deyilsə, həmin futbolçunun yeri ya ehtiyat skamyadı, ya da tribuna. Hərçənd indi artıq futbolçular tribunaya yollanmır.

- Bəli, artıq ehtiyatdakılar üçün çox yer var.
- Əvvəlki illərdə iştirak ərizəsinə düşməyən futbolçuları seçmək çox çətin idi. Çünki sən onları həftəboyu qaçmağa, ağır məşqlər keçməyə məcbur etdiyin halda həftəsonu tribunaya göndərmək məcburiyyətində qalırdın. Bu, çox sərt qərardı. Futbolçu üçün bu qərarla barışmaq ağır olurdu. Elə məşqçi üçün də seçim etmək çətin olurdu. İndi isə az qala komandadakı bütün oyunçular ehtiyatda otura bilir. Bu yaxşı haldı. Ehtiyatda oturan futbolçu da bir növ prosesin içində sayılır. Çünki məşqçi hər an onu meydana buraxa bilər.

- İbrahimoviç bir neçə dəfə vurğulayıb ki, siz onunla maraqlı rəftar edirdiz. Bir növ onunla psixoloji oyunlar oynayırdız. Necə düşünürsüz, onun bu cür liderə çevrilməsində sizin rolunuz olubmu?
- Mən İbranı fərqləndirmirdim. Başqalarına necə yanaşırdımsa, ona da o cür yanaşırdım. İstedadlı futbolçunun əsas özəlliyi onun tez öyrənməsindədi. Belə futbolçular məşqçinin onlara dediyi sözləri beyinlərində analiz edib özlərinə faydalı olanları yadda saxlayırlar. İstedadlı olmayan oyunçular isə bir qayda olaraq özlərindən razı olur. Belələrinə nəsə demək sadəcə vaxt itkisidi. Fərqi futbolçunun mentaliteti yaradır. Mənim qarşıma dəfələrlə istedadlı və eyni zamanda artıq hər hər şeyə nazil olduğunu düşünən futbolçular çıxıb. Ya da belə oyunçular ilk problemdəcə “ağ bayraq” qaldırırlar. Komanda üçün vacib rol oynamaq istəyirsənsə, özünü göstərməli və nəyə qadir olduğunu sübut eməlisən.