İtaliya çempionatında ötən mövsümün laureatları müəyyənləşib. A seriyasının ən yaxşı futbolçusu, məşqçisi, komandası və hakimi mükafatlandırılıb.

Football-plus.az xəbər verir ki, Turin şəhərində keçirilən “Gran Gala Calcio Serie A” mərasimində son çempion “Milan” ən yaxşı komanda, bu komandanı çalışdıran Stefano Pyoli ən yaxşı məşqçi seçilib. İlin ən yaxşı futbolçusu “Milan”nın hücumameyilli yarımmüdafiəçisi Rafael Leao seçilib. Daniele Orsato isə son mövsümün ən yaxşı hakimi üçün ayrılan mükafata sahib çıxıb.

A seriyasında ötən mövsümün rəmzi komandası da müəyyənləşib. “Milan” daha çox – 4 oyunçu ilə təmsil olunub: qapıçı - Mayk Menyan (Milan); müdafiəçilər - Covanni Di Lorentso (Napoli), Qleyson Bremer (Torino), Fikayo Tomori, Teo Ernandes (hər ikisi “Milan”); yarımmüdafiəçilər -Nikola Barella, Marselo Brozoviç (hər ikisi “İnter”), Sergey Milinkoviç-Saviç (Latsio); hücumçular: Rafael Leao (Milan), Duşan Vlahoviç (Fiorentina/Yuventus), Çiro İmmobile (Latsio).