Futbol üzrə dünya çempionatı ən güclülərin yarışıdı.


Football-plus.az xəbər verir ki, amma ən güclülərin hamısını iş başında görmək arzumuz bu dəfə də çin olmayacaq. Zədəli olduğunu və mundialda Seneqal yığmasına ilk oyunlarda kömək etməyəcəyini bildiyimiz Sadio Manenin taleyinə srağagün gec saatlarda aydınlıq gəldi. Yığmanın baş məşqçisi Aliu Sisse onun adını iştirak ərizəsindən çıxarmalı oldu. Dünyanın aparıcı yığmalarının mundiala qatılmayacaq başqa futbolçuları kimlərdi?

İngiltərə
Zədə: Ris Ceyms, Ben Çiluell
Məşqçi qərarı: Temmi Abraham, Fikayo Tomori, Ceydon Sanço, Carrod Bouen
“Çelsi”nin birdən-birə iki müdafiəçisi qışda ciddi zədə alaraq dünya çempionatından kənarda qaldı. Söhbət Ben Çiluell ilə Ris Ceymsdən gedir. Qaret Sautqqeyt adı çəkilənlərdə yanaşı, “Milan”ın müdafiəsiəsinin liderlərindən biri olan Fikayo Tomorini də heyətə salmadı. “Üç şir”in çalışdırıcısını hücumla bağlı seçim imkanı gedişdi, istənilən halda kimsə kənarda qalacaqdı. Ceydon Sanço MY-də inkişafdan qalıbsa, “Vest Hem”in yarımmüdafiəçisi Carrod Bouen premyer-liqanın ən güclü futbolçuları səviyyəsinə yüksəlib və Sautqeytin mərhəmətinə ümid edə bilərdi. Ancaq həm o, həm də “Roma”dakı Temmi Abraham cari mövsümü ötənilkindən pis keçirir.

İspaniya
Məşqçi qərarı: David De Xea, Serxio Ramos, Tyaqo Alkantara, Markos Alonso, Kepa Arrisabalaqa
Luis Enrikenin sərəncamında çoxlu səviyyəli oyunçu olduğuna görə sensasiyalı məşqçi qərarları qaçılmaz idi. David De Xea hətta 55 oyunçudan ibarət geniş heyətə də düşmədi, qapıçıların yekun “3-lüy”ündə premyer-liqanın daha bir top səviyyəli qapıçısını – Kepanı da görmədik.
Markos Alonso son vaxtlar “Barselona”da müntəzəm oynayır, hətta ona yad olan mərkəz müdafiəçisi mövqeyində də. Ancaq bu məqam yığmanın çalışdırıcısını heyran etmədi. Qeyri-sabit oyun göstərən “Liverpul”un Tyaqo Alkantarası da siyahıdan kənarda qaldı. Ancaq İspaniya yığması ilə bağlı əsas şok Serxio Ramosun yoxluğudu. Yığmanın sabiq kapitanı AÇ-2020-yə sağlıq durumu üzündən getməmişdisə, bu dəfə Enrike ona dəvət göndərməyi lazım bilmədi. Ramosun artıq 36 yaşı var, bu isə o deməkdi ki, onu bir daha hansısa böyük turnirdə görməyəcəyik.

Portuqaliya
Zədə: Dieqo Jota, Pedro Neto
Məşqçi qərarı: Joao Moutinyo, Renato Sanşeş
“Liverpul”un hücumçusu Dioqo Jota oktyabrda ciddi zədə almasaydı, yəqin dünya çempionatına yollanacaqdı. Məhz zədə premyer-liqanın digər təmsilçisini – “Vulverhempton”un vingeri Pedro Netonu da yığmadan kənarda qoydu.
Portuqaliya yığmasında orta sahə ilə bağlı seçim imkanı genişdi. Bu üzddən Fernando Santuş ağır qərar verməli oldu. Portuqaliyaya AÇ-2016-nın qızıl medalını qazandıran iki xavbel – Joao Moutinyo və Renato Sanşeş siyahıdan çıxarıldı. Birinci “Vulverhempton”un heyətində müntəzəm çıxış edir, ancaq 36 yaşı var, ikinci isə PSJ-nin əsas heyətində, demək olar ki, görünmür.

Niderland
Zədə: Corcinyo Viynaldum
Məşqçi qərarı: Yasper Silessen, Rayan Qravenberx, Qus Til, Kvinsi Promes
“Spartak” azarkeşləri “narıncılar”ın heyətində kimisə dəstəkləyə bilməyəcək. Kvinsi Pomesin siyahıya düşmək şansı onsuz da az idi, moskvalıların sabiq xavbeki Qus Til isə bu mövsüm ötən mövsümdəki qədər məhsuldar deyil.
Rayan Qravenberx “Bavariya”da nadir hallarda oynayır, bu üzdən siyahıya salınmaması təbiidi. Yasper Silessen Niderland çempionatının ortabablarından NEK-in qapısını pis qorumasa da, Lui van Qal bürünc qazandıqları DÇ-2014-də yığmanın əsas qapıçısı olan 39 yaşlı Remko Pasverə (Ayaks) üstünlük verdi. Viynaldum avqustdan bəri zədəlidi – bu mövsüm yalnız 12 dəqiqə oynayıb.

Argentina
Zədə: Covanni Lo Çelso
Məşqçi qərarı: Anxel Korrea, Covanni Simeone
Argentina həm də ona görə qarşıdakı dünya çempionatının favoritlərindən sayılır ki, heyətlə bağlı itkisi yoxdu. Yalnız oktyabrdan bəri “Vilyarreal”ın formasını geyə bilməyən Covanni Lo Çelsonu müəyyən mənada itki saymaq olar.
Argentinada səviyyəli hücumameyilli futbolçuların da sayı çoxdu. Bu üzdən Anxel Korrea ilə Covanni Simeonenin kənarda qalması heç kimi təəccübləndirmir – ikisi də “Atletiko” və “Napoli”də rotasiya oyunçusudu. Sifariş ərizəsində Paulo Dibalanın görünməsi isə yaxşı mənada təəccübləndirir. “Roma”nın forvardı zədə üzündən bir ay oynamasa da, artıq bərpa olunub və hətta komandasının son çempionat oyununda da meydana çıxıb.

Almaniya
Zədə: Timo Verner, Marko Roys
Məşqçi qərarı: Robin Qosens, Yulian Draksler
Sağlıq durumu ilə bağlı problemlər Marko Rorysu artıq bir neçə böyük turnirə qatılmaq imkanından, eləcə də “qızıl” gətirən DÇ-2014-dən məhrum edib. “Borussiya”nın kapitanı daha bir dünya çempionatını buraxacaq. Timo Vernerin yoxluğu da ciddi itkidi. Almaniya yığması mərkəz hücumçuları sarıdan qıtlıq yaşayır, “Leyptsiq”in forvardı əsas heyətdə olacaqdı. Robin Qosens 2021/22 mövsümündə A seriyasının ən yaxşı oyunçularından idi, ancaq ağır zədədən və “Atalanta”dan “İnter”ə transfer olunandan sonra sol cinah yarımmüdafiəçisi zəiflədi. Draksler də vaxtilə qeyri-adi dərəcədə istedadlı sayılırdı, ancaq indi nə “Benfika”nın əsas heyətində düşür, nə də yığmaya dəvət olunur.

Fransa
Zədə: N'Qolo Kante, Pol Poqba, Mayk Menyan
Məşqçi qərarı: Vissam Ben Yedder, Kleman Lanqle, Ferlan Mendi
Son dünya çempionları Qətərdə aparıcı mərkəz oyunçularının – Pol Poqba və N'Qolo Kantenin yoxluğunda oynamalı olacaq. “Milan”ın əsas qapıçısı Menyan da zədəlidi, hərçənd “1 nömrə” statusu uğrunda Uqo Lyorislə rəqabət apara bilərdi. Vissam Ben Yedder bu mövsüm məhsuldarlıq baxımından çərçivəni bir qədər aşağı salıb, amma Didye Deşam əvvəllər də onu həvəslə meydana buraxmırdı. Eyni sözləri Kleman Lanqle haqda da demək olar – “Tottenhem”in müdafiəçisi yığmada heç vaxt əsas oyunçu sayılmayıb. Ferlan Mendinin yoxluğu isə istər-istəməz təəccüb doğurur. “Real”ın əsas müdafiəçisi yığmanın son iki oyununda ilk dəqiqələrdən meydanda olub, amma Qətərə aparılmadı.

Braziliya
Zədə: Artur Melo
Məşqçi qərarı: Filippe Koutinyo, Roberto Firmino, Qabriel Barboza
Braziliya yığmasının zədəlilər baxımından ciddi itkisi yoxdu. Artur onsuz da üç ildi əsas heyət oyunçusu sayılmır, üstəlik “Barselona”dan gedəndən sonra tərəqqi əvəzinə tənəzzül yaşayır. Bütün itkilər məşqçinin qərarı ilə bağlıdı. Yığmanın baş məşqçisi Barboza ilə Firminonun əvəzinə başqa mərkəz hücumçularını seçdi, Koutinyonun aparılmayacağı isə bir neçə həftə əvvəldən bəlli idi ki, bu da məntiqlidi: “Aston Villa”nın yarımmüdafiəçisi bu mövsüm nə qol vurub, nə də məhsuldar ötürmə verib.

Belçika
Zədə: Aleksis Salemakers
Məşqçi qərarı: Divok Orici, Kristian Benteke, Ceyson Denayer
Belçikada ənənəvi olaraq müxtəlif mövqelərə çoxlu səviyyəli oyunçu var, bu üzdən “Milan”ın vingeri Aleksis Salemakersin zədələnməsi Roberto Martines üçün problem deyil. Yığmanın sifariş ərizəsi Avropa klublarının futbolçularından ibarətdi. ABŞ-da oynayan Kristian Benteke ilə BƏƏ-də oynayan Ceyson Denayer Qətərə aparılmayacaq. Divok Oricinin kənarda qalması da məntiqlidi – forvard “Milan”da az oyun vaxtı qazanır və payız boyunca yalnız bir qol vurub.