“Sabah” sabah Çempionlar Liqasının 3-cü təsnifat mərhələsində “Orhus”la cavab görüşünə çıxacaq.

“Football-plus.az” xəbər verir ki, bu gün “bayquşlar”ın baş məşqçisi Valdas Dambrauskas oyunöncəsi mətbuat konfransı keçirib.

- Əvvəlcə “Orhus”a xoş gəldin deyirəm. Sabah 3-cü təsnifat mərhələsinin cavab görüşünə çıxacağıq. İnanıram ki, Danimarkada əldə edilən nəticə bu matça həyacan qatacaq. Bir qol fərqi qapanılmayacaq fərq deyil. Rəqib sabahki matça ciddi hazırlaşacaq. Biz isə doğma azarkeşlərimiz qarşısında matça çıxacağıq. Qol fərqini aradan qaldıran komanda biz olacağıq. Oyunçuların hər biri hazırdı. Futbolçular, məşqçilər, rəhbərlik - hər kəs sabah əlindən gələni edəcək ki, mərhələni adlayan tərəf olaq. Həfətiçi matçlar ağır olur. Biz matça hazırıq.

- Biz ilk matçda rəqibi yaxşı təhlil etdiyinizi görmüşdük. Sadəcə, Bogera iki boşluqdan yararlana bildi. Bu baxımdan tədbir görəcəksizmi?
- Rəqibimiz bir oyunçudan ibarət deyil. Rəqibin çox yaxşı heyəti var. Avropada geniş təcrübəmiz yoxdu. Futbolçularımızın özündə belə şübhə ola bilər ki, biz belə yaxşı matç göstərdik. Danimarkada rəqib azarkeşlər qarşısında belə oynasaq da, nəticəyə görə məyus olduq. Rəqibin çox az fürsəti olsa da, bundan istifadə edə bildi. Son 5-6 oyunda da bu rəqəm yüksək olmayıb. Buna baxmayaraq, az fürsətdən istifadə edə bilirlər.

Əlbəttə, həmin futbolçuya da xüsusi diqqət yetirəcəyik. Amma bir daha deyirəm ki, söhbət yalnız bir oyunçudan getmir. Rəqib komanda şəklində çox keyfiyyətlidi. Eyni zamanda bizim də çox keyfiyyətli komandamız var. Danimarkadakı oyunda müəyyən səhvlərimiz oldu, sabah həmin səhvləri düzəltməliyik. Təbii ki, rəqib də ilk matçı təhlil edib, çatışmazlıqları üzərində işləyəcək. Kim xırda səhvləri və detalları daha yaxşı təhlil edib, meydanda düzgün icra edəcəksə, düşünürəm ki, qalib gələn tərəf də o olacaq. Sabah hər şeyi xırda detallar həll edə bilər. Amma biz ev komandasıyıq. Daha yaxşı köklənsək və konsentrasiyamızı yüksək səviyyədə saxlasaq, qalib gələn tərəf ola bilərik.

- Azarkeş təsirini vurğuladız. Bəs hava amilinin “Sabah”ın əsas üstünlüyü olduğunu demək olarmı?
- İqlim və hava şəraiti barədə də çox danışılır. Bəzən sərin, bəzən isə isti havanın üstünlük yaradacağı qeyd olunur. Məncə, bu amil bir qədər şişirdilir. Biz Danimarkada oynayarkən də hava fərqli ola bilərdi. Rəqib peşəkar komandadı və düşünmürəm ki, bu, həlledici amil olsun. Fikrimcə, səfər oyunlarında hava ilə bağlı ən ciddi təsir göstərə biləcək amil güclü küləkdi. Bu da hər iki komandaya eyni dərəcədə mane ola bilər. Amma sabah belə hava şəraiti gözləmirəm. Üstəlik stadionumuz da qapalıdı. Buna görə də havanın bizə xüsusi üstünlük verəcəyini düşünmürəm.

- Komandada axsayan məqam bitiricilikdi. Buna çarə axtarırsız?
- Fərqli hazırlaşmırıq. Biz hər oyunda qol vurmağa çalışırıq. Məni məmnun edən məqam qol vəziyyətləri yaratmağımızdı. Sabah azarkeşlərimizin köməyi və dəstəyi ilə qələbə qazanıb, mərhələ keçəcəyik.