''Real''ın türkiyəli ulduzu Arda Gülər ilə bağlı yeni transfer iddiası var.

İspaniya mənbələrinin yazdığına inansaq, PSJ 21 yaşlı yarımmüdafiəçiyə ciddi maraq göstərir. Son iki ildə Çempionlar Liqasının qalibi olan Paris nəhəngi Madrid nəhənginə 115 milyon avroluq təklif irəli sürüb!

Bu iddianı İspaniyanın o qədər də etibarlı mənbələrindən sayılmayan ''Fichajes'' portalı irəli sürüb. Mənbənin yazdığına inansaq, ''Kral klubu'' Türkiyə yığmasının üzvü ilə vidalaşmaqda maraqlı deyil. Üstəlik Ardanın yaşını və potensialını nəzərə aldıqda, ''Real'' rəhbərliyinin fikrincə, təklif də yetərli deyil. PSJ əlbəttə ki, ''Real''ın tələb etdiyi məbləği ödəmək iqtidarındadı. Ona görə də parislilərin təklifi artıraraq yenidən ''Real''ın qapısını döyəcəyi istisna edilmir. ''Fənərbaxça'' da bu xəbərləri diqqətlə təqib edir. Çünki transferdən əldə olunacaq məbləğin 20 faizi İstanbul nəhənginə çatacaq. ''Real''ın yeni çalışdırıcısı Joze Mourinyonun hələlik Ardanın performansından razı olduğu bildirilir.

Ən son ''Ferenstvaroş''a qarşı hazırlıq oyununda Gülər ''Real''ın heyətində 90 dəqiqə meydanda qalan iki futbolçudan biri oldu. Madridlilərlə 2029-a qədər müqaviləsi olan Arda ötən mövsüm iştirak etdiyi 51 rəsmi oyunda aktivinə 6 qol, 14 məhsuldar ötürmə yazıb. ''Transfermarkt''da onun indiki dəyəri 90 milyon avro göstərilib.