''Qalatasaray'' yay hazırlıq dönəmində sonuncu yoxlama oyununu keçirib. Türkiyə çempionu bu dəfə doğma ''Rams Park''da İspaniya təmsilçisi ''Vilyarreal'' ilə qarşılaşıb.

Fanatlar yenə oyuna maraq göstərməyiblər və bu dəfə də zəif transfer siyasətinə görə rəhbərliyə qarşı şüarlar səsləndiriblər. Ən əsası ''Cim-Bom'' yenə fanatlarını sevindirə bilməyib. Oyunu idarə edən türkiyəli hakim Kadir Sağlam matçın əvvəllərində Leminanın əllə oyununa görə ispanların lehinə penalti təyin edib. Ayoze Peres 3-cü dəqiqədə komandasını önə keçirib.

Maraqlıdı ki, Okan Buruk epizoda etirazına görə əvvəlcə sarı vərəqə alsa da, əl çalaraq etirazını davam etdirincə qırmızı vərəqə alaraq tribunaya yollanmalı olub. Beləcə oyunun əvvəllərində baş məşqçisiz qalan ''sarı-qırmızılar'' buna baxmayaraq hesabı erkən bərabərləşdiriblər.

Viktor Osimhen 5-ci dəqiqədə Ərən Elmalının ötürməsindən sonra başla topu tora göndərib. Yoxlama oyunu ab-havasında keçməyən və zaman-zaman gərginliyə səbəb olan oyunda ''Vilyarreal'' fasilə ərəfəsində gürcüstanlı legioner Jorj Mikautadze ilə yenidən hesabda önə keçib. Bu, görüşdə sonuncu qol olub.

İkinci hissədə ''Qalatasaray''ın 3-cü qapıçısı statusunda olan Jankat Yılmaz bir neçə önəmli seyvlə fərqin artmasına imkan verməyib.

Beləliklə, ''Qalatasaray'' bu hazırlıq dönəmində keçirdiyi 5 oyundan 4-də qələbəyə həsrət qaldı! Komanda yalnız ilk oyunda aşağı liqa təmsilçisi ''Ümraniyəspor''u 5:1 yendi. Sonrakı oyunlarda isə İstanbul nəhəngi ''Montsa'' (0:2), ''Venetsiya'' (0:3), ''Renn'' (3:3) və son olaraq ''Vilyarreal'' (1:2) ilə bacara bilmədi.