“Qurban Qurbanov meydana çıxmaq üçün hazırlaşmasını istəmişdi, lakin...” – Bəhlulun qayıdışına nə mane olub?
Ötən mövsüm, daha dəqiqi, fevralın 18-də, Çempionlar Liqasının pley-offunda “Qarabağ”ın heyətində “Nyukasl”a qarşı oyunda zədələnən Bəhlul Mustafazadə hələ də yaşıl meydana qayıtmayıb. Xatırlayırsızsa, fevralın 19-da yayılan xəbərdə futbolçunun reabilitasiya dövrünün təxminən 10-12 həftə davam edəcəyi bildirilmişdi. Artıq həmin vaxtdan 5 aydan çox keçib. Lakin Bəhlulun adı matçların iştirak ərizəsində yer alsa da, şans qazanmır.
Bunun səbəbini öyrənmək üçün Bəhlulun atası Ələmdar Mustafayevlə əlaqə saxladıq. Onun “Football-plus.az”a cavabı:
“Bəhlulun durumu yaxşıdı. Zədəsi sağalıb. Şükür Allaha, hər şey geridə qalıb. Ötən oyunlarda komandasına kömək edə bilmədiyi üçün məyusdu. Hazırda tam formada deyil. Bu üzdən start heyətində meydana çıxa bilməz. ÇSKA ilə səfər matçında baş məşqçi Qurban Qurbanov meydana çıxmaq üçün hazırlaşmasını istəmişdi, lakin hücumçu Zakaria Savo zədələndiyi üçün qayıdışı təxirə düşdü. Bəhlulun məşqlərini izləyirəm. Böyük ölçüdə irəliləyiş var. Komandayla birgə “Dinamo”ya qarşı oyun üçün səfərə yollanacaq. Ümid edirəm ki, həmin matçda oynaya biləcək”.
KƏNAN BAHADIR
Digər xəbərlər
