Ronaldodan yığmanın düşərgəsində qəribə davranış
Kriştiano Ronaldonun dünyaya səs salan qalmaqallı müsahibəsindən xəbərdarsız.
Football-plus.az xəbər verir ki, artıq “Mançesterlə Yunayted”lə vidalaşması zaman məsələsi olan portuqaliyalı hücumçunun dünya çempionatına hazırlaşan yığmanın düşərgəsində necə qarşılanacağı maraq doğururdu. Karyerasındakı son mundialının keçirəcək Kriştiano yığmanın düşərgəsindədi və məşqdən şəkillər yaymağa da imkan tapıb. Şəklin altında isə bunları yazıb:
“Portuqaliya yığmasındakı işimizə tam köklənmə. Vahid hədəfə can atan – bütün portuqaliyalıların arzusunu gerçəkləşdirməyə çalışan vahid komanda”.
Ancaq “Daily Mail” bu arada Kriştiano – “Yunayted” gərginliyinin yığmaya da köçdüyünü iddia edib. Sosial şəbəkələrdə yayılan çox maraqlı videoçarxdan belə görünür ki, Kriştiano Fernandeşlə görüşərkən Bruno özünü heç də dostcasına aparmır. Ronaldo əlini uzadır, Bruno isə sanki salamlaşmaqdan yayınır – çox qəribə mənzərədi. Portuqaliyalı jurnalist Pedro Sapulveda isə bu haqda belə yazıb:
“Kadrlar çox soyuq təsir bağışlayır. Ronaldo ilə Bruno dünya çempionatı ərəfəsində yığmanın düşərgəsində ilk dəfə görüşür və heç birinin üzü gülmür. Kriştiano yığmanın düşərgəsində birinci təşrif buyurub, Fernandeş isə lap sonda, baxmayaraq ki, ikisi də eyni klubun şərəfini qoruyur. Ronaldo Bruno ilə zarafatlaşıb: bəlkə təyyarə ilə yox, gəmi ilə gəlmisən? Yeganə danışıqları bu olub. Onlar arasında heç bir problem yoxdu, ikisi də dünya çempionatına köklənib”.
Yığmanın oyunçularından Joao Mario da bu versiyanı təsdiqləyib:
“Mən ordaydım və hər şeyi gördüm, çox maraqlı məqam idi, kənardakılar bu zarafatı yanlış anlayıb”. Marionun dediyinə görə, Kriştianonun müsahibəsi yığmadakı atmosferə təsir etməyib: “Heç bir əlavə təzyiq yoxdu. Biz hamımız belə şeylərə öyrəşmişik, ona görə ki, böyük klubların şərəfini qoruyuruq. Qəzet manşetləri həmişə Ronaldo haqda olur. Düzünü desəm, biz hər dəfə yığmanın düşərgəsinə gələndə ilk növbədə Ronaldodan söhbət düşür. Həmişə bütün diqqətlər ona yönəlir və biz artıq belə duruma öyrəşmişik”.
Kriştianonun qəribəlikləri Bruno ilə salamlaşma epizodu ilə bitməyib. MY-nin ulduzu məşq zamanı Joao Kanseloya yaxınlaşaraq qəfil onun boynundan tutub. Kriştiano müdafiəçini silkələsə də, o, sakitliyi qoruyub.
Ümumiyyətlə, Ronaldo son vaxtlar yaşıl meydandan o qədər də yaxşı təsir bağışlamır – özü də təkcə klubunda yox, yığmada da. Məsələn, Millətlər Liqası çərçivəsində İspaniya ilə həlledici oyunda (0:1) 90 dəqiqəni çox sönük keçirdi, sonra isə kapitan sarğısını meydana atdı. Ötən ilin martında – DÇ-nin Serbiya ilə seçmə oyununun (2:2) gedişində də belə etmişdi. Portuqaliyalı ulduzu hakimlərin onun vurduğu qolu qeydə almaması özündən çıxarmışdı. İspaniya ilə oyundakı fiaskodan sonra Portuqaliya mediasında hətta Kriştianonu DÇ-2022-yə aparmamaqla bağlı çağırışlar yer almışdı. Məsələn, ölkənin əsas idman qəzeti “A Bola”nın manşeti belə idi: “Daha az Ronaldo, daha çox Portuqaliya”. Məna aydındı: Kriştiano gələcəyi olan futbolçuların yerini tutur. Futbol taktikası haqda yazan “Breaking the lines” saytının yaradıcısı Zak Louinin isə məsələyə yanaşması belədi:
“Kriştiano Ronaldonun hələ də Portuqaliyanın start heyətində çıxmasının qətiyyən heç bir izahı yoxdu. Rafael Leao, Pedro Neto, Joao Feliş və bir çox başqa istedadlı oyunçu şans gözlədiyi halda, bu mümkünsüzdü. Ronaldo İspaniyaya qarşı növbəti dəfə solğun oynadı”.
Bu fikirlər öz yerində, ancaq ədalətli olmaq lazımdı. Heç şübhəsiz, futbol dünyası karyerasında sonuncu mundiala qatılan Messi ilə yanaşı, Ronaldodan da qəhrəmanlıq gözləyir.
Digər xəbərlər
