“Kəpəz” – “Karvan-Yevlax” matçı (2:1) əsasən stadionun indiki vəziyyətini qiymətləndirmək məqsədi daşıyıb. Oyunu izləyənlər arasında Peşəkar Futbol Liqasının texniki-idman departamentinin yarışların təşkili və qeydiyyat şöbəsinin baş mütəxəssisi Elvin Yaqubovla Media və marketinq departamentinin media şöbəsinin baş mütəxəssisi Anar Əsədov da olub. Onların əsas vəzifəsi stadionun premyer-liqanın tələblərinə nə dərəcədə uyğun olduğunu yoxlamaq idi.
Müfəttişlər stadionda nə gördü? Burda premyer-liqa matçlarının keçirilməsi üçün maneə varmı?
“Football-plus.az” olaraq, bu suallara cavab tapmaq üçün Gəncəyə səfər edən Elvin Yaqubovla əlaqə saxladıq:
“Bu suallara mən cavab verə bilməyəcəm. Təftişin nəticəsi məxfidi. Stadionla bağlı hesabat PFL-ə təqdim olunub. Yekun qərarı ən qısa zamanda qurum verəcək. “Kəpəz” ilk oyununu evdə keçirəcək. Görüşün baş tutacağı stadionun adı açıqlananda bu məsələyə aydınlıq gələcək”.
İSRAYIL XEYRULLAYEV
