“Qarabağ” ötən həftə Avropa Liqasının G qrupunun oyununda doğma meydanda “Nant”ı 3:0 hesabı ilə məğlub etdi.

Football-plus.az xəbər verir ki, ağdamlılar bu qələbə sayəsində şəxsi əmsalını artıra bilməsə də (hələ ki şərti olaraq 2 xalını əldə etdi, əmsalı artırmaq üçün daha 1 xala ehtiyacı var - S.İ.), büdcəsini zənginləşdirdi. Belə ki, “köhlən atlar” fransızlar üzərində qələbəyə görə 630 min avro əldə etdi. Bundan başqa, klub bu qələbə sayəsində Avropa Liqasındakı 8 qrupda 2 tur ərzində qeydə alınan bərabərliklərə görə də qazancını artırıb. Bu məbləğ hələ ki 4468 avrodu. Qrup mərhələsinin sonuna kimi ağdamlılar qələbə qazanmasa belə, başqaıarının heç-heçəsi sayəsində də gəlir əldə edəcək.

Ümumiyyətlə, “Qarabağ”ın mövsüm ərzində avrokuboklardan qazandığı məbləğ 11 milyon 508 min 468 avroya bərabərdi. Bura televiziya və reklam gəlirləri daxil deyil. Maraq üçün qeyd edək ki, “Nant” üzərindəki qələbə Ağdam təmsilçisinin UEFA-nın maliyyə sıralamasında irəliləməsinə səbəb olub. “Köhlən atlar” “Srvena Zvevda”nı qabaqlayaraq 35-ci pilləyə yüksəlib.

İLKİN SULTANLI