Avstriya toplanışını davam etdirən ''Qalatasaray'' dünən 3-cü yoxlama oyununda qüvvəsini sınayıb. ''Cim-Bom'' bu dəfə Çexiya təmsilçisi ''Siqma'' ilə qarşılaşıb. Oyun Hartberq şəhərindəki ''Profertil Arena''da keçirilib. Baş məşqçi Okan Buruk bu ''11-liy''i meydana buraxıb: Muslera, Elabdellaui, Nelsson, Emin Bayram, Van Anholt, Oliveyra, Çikıldau, Yunus Akgün, Əmrə Akbaba, Kərəm Aktürkoğlu, Qomis. Yeni transferlərdən Serxio Oliveyra ilk dəfə oynamaq şansı qazanıb və 69 dəqiqə meydanda olub. Buruk 2-ci hissənin gedişində Muslera da daxil olmaqla bütün oyunçuları əvəzləyib. Əvvəlki hər iki oyunda uduzduğuna və cəmi 1 qol vura bildiyinə görə tənqid olunan İstanbul nəhəngi bu dəfə inamlı təsir bağışlayaraq ilk qələbəsini qazanıb. İlk yarısı qolsuz bitən qarşılaşmanın ikinci yarısına Yunus Akgün damğa vurub. İstedadlı vinger 59-cu dəqiqədə topu uzaq küncə göndərərək baxımlı qolla hesabı açıb. 6 dəqiqə sonra Yunus bu dəfə assistent rolunda çıxış edib və Qomis yekun nəticəni müəyyənləşdirib. Qeyd edək ki, ''Qalatasaray''ın öz yetirməsi olan 21 yaşlı Yunus ötən mövsümü icarə əsasında ''Adana Dəmirspor''da keçirmiş və 9 qol, 17 məhsuldar ötürməlik performansla diqqət çəkmişdi. ''Sarı-qırmızılar'' yeni mövsümdə bu futbolçudan çox şey gözləyir. ''Qalatasaray'' Avstriya toplanışında son oyununu iyulun 19-da Çexiyanın digər təmsilçisi ''Pardubitse''yə qarşı keçirəcək. Xatırladaq ki, ''Cim-Bom'' ilk görüşdə ''Şturm''a 1:2, ikinci oyunda ''Fehervar''a 0:1 hesabı ilə yenilmişdi.