Yeni mövsümə hazırlığını davam etdirən ''Beşiktaş'' dünən Avstriya toplanışında 3-cü yoxlama oyununu keçirib.

Football-plus.az xəbər verir ki, ''Kufştayn Arena''da İstanbul nəhəngi bundesliqa təmsilçisi ''Maynts-05'' ilə qarşılaşıb. Baş məşqçi Valerien İsmael meydana bu ''11-liy''i buraxıb:

Ərsin Destanoğlu, Nəcip Uysal, Velinton, Montero, Rozye, Salih Uçan, Fernandeş, Umut Meraş, N'Kudu, Əmirhan Delibaş, Cenk Tosun. Fransalı mütəxəssis ikinci yarıda Rozye və Monterodan başqa bütün oyunçuları əvəzləyib.

''Qartal''ın yeni forvardları Veqhorst və Muleka fasilədə meydana çıxaraq bu hazırlıq dönəmində ilk dəfə oynamaq şansı qazanıb. O qədər də zəif olmayan rəqibini 1:0 hesabı ilə məğlub edən ''Beşiktaş'' öz oyunu ilə xoş təsir bağışlayıb. Hiss olunur ki, oyunçular yavaş-yavaş İsmaelin oyun tərzinə uyğunlaşmağa başlayırlar. Görüşdə yeganə qolu Cenk Tosun öz aktivinə yazıb. 24-cü dəqiqədə Salih Uçandan topu qəbul edən təcrübəli forvard uzaq küncü dəqiq nişan alıb.

Qeyd edək ki, ''Beşiktaş'' Avstriya toplanışını məğlubiyyətsiz başa vurdu. ''Ağ-qaralar'' ilk oyunda ''Verder''i 2:1 hesabı ilə məğlub etmişdisə, Plzen ''Viktoriya''sı ilə keçirilən ikinci oyunda qapılara qol vurulmamışdı. Komanda bu gün vətənə qayıdacaq və ayın 20-də ikinci toplanış üçün İspaniyanın Alikante şəhərinə yollanacaq. Orda ''Beşiktaş'' iyulun 23-ü ''Vulverhempton'', 26-sı ''Alaves'' ilə qarşılaşacaq.