Avstriya toplanışını davam etdirən ''Qalatasaray'' dünən ikinci yoxlama oyununu keçirib.


"Football-plus.az" xəbər verir ki, ilk görüşdə ''Şturm''a 1:2 hesabı ilə məğlub olan ''Cim-Bom'' bu dəfə ''Qəbələ''nin Konfrans Liqasının 2-ci təsnifat mərhələsindəki rəqibi ''Fehervar''la qarşılaşıb. Hartberq şəhərindəki ''Profertil Arena''da keçirilən oyunda İstanbul nəhəngi yenə fanatlarını məyus edib. Baş məşqçi Okan Buruk meydana bu ''11-liy''i buraxıb: Batuhan Şən, Barış Alpər Yılmaz, Nelsson, Əbdülkərim Bardakçı, Van Anholt, Berkan Kutlu, Çikıldau, Yunus Akgün, Əmrə Akbaba, Kərəm Aktürkoğlu, Mustafa Məhəməd. Göründüyü kimi qapı xətti istisna olmaqla digər mövqelərdə əsas oyunçular meydana çıxmışdı. İkinci hissədə Qomis, Dianye, Taylan Antalyalı, Əmrə Kılınc kimi oyunçular da şans qazandı. Yəni ''Qalatasaray'' heç də zəif heyətlə oynamamasına baxmayaraq rəqibinə minimal hesabla boyun əydi. Matçboyu komandanın müdafiədə yol verdiyi boşluqlar diqqət çəkdi. Top itirildikdən sonra oyunçular geri qayıtmaqda çətinlik çəkirdilər. Elə qol da məhz bu cür vəziyyətdə buraxıldı. 32-ci dəqiqədə Əbdülkərim Bardakçının səliqəsiz ötürməsindən sonra ''Fehervar'' topu elə keçirdi. Macarların sürətli hücumu Kənan Kodronun qolu ilə nəticələndi. ''Qalatasaray''da Yunus Akgün və fasilədə meydana çıxan Həmzə Yiğit Akman öz oyunu ilə diqqət çəkməyi bacarsa da, onların fəallığı bəhrəsini vermədi.

'Qalatasaray'' 3-cü yoxlama oyununu iyulun 16-da Çexiya təmsilçisi ''Siqma''ya qarşı keçirəcək.

ƏLİ