''Qalatasaray''ın Avstriya toplanışı davam edir.

Komandanın keçirdiyi hər iki yoxlama matçında büdcə baxımından özündən qat-qat zəif olan rəqiblərə yenilməsi və iki oyunda bir qol vurması fanatlar arasında müzakirələrə səbəb olub.

Bilindiyi kimi, İstanbul nəhəngi ilk görüşdə ''Şturm''a 1:2, ikinci görüşdə ''Fehervar''a 0:1 hesabı ilə məğlub oldu. Baş məşqçi Okan Buruk macarlara məğlubiyyətin ardından ''problemlərimizi açıq şəkildə gördük. Markaonun olduğu bölgəyə, yarımmüdafiənin mərkəzinə və irəliyə yeni transferlər lazımdı'' deyərək rəhbərliyə mesaj göndərdi.

Bu iki qarşılaşmada diqqəti cəlb edən başqa məqamlara da nəzər salaq. İlk növbədə ''Qalatasaray''lıların fiziki cəhətdən hazır olmaması və az qala bütün ikili mübarizələrdən məğlub ayrılması diqqəti çəkdi. Çiyin-çiyinə mübarizələrdə oyunçular bir qayda olaraq uduzurdu. Buraxılan qollarda fərdi səhvlərə yol verildi.

Xüsusilə də ''Fənərbaxça''nın əlindən son anda qoparılan Əbdülkərim Bardakçı çalışqanlığı ilə yadda qalsa da, 3 qoldan ikisi məhz onun səhvindən buraxılıb. Mustafa Məhəmədlə Bafetimbi Qomisin ötən mövsümdən başlayan qol imkanlarını qaçırmaq xəstəliyi yenə də davam edir. Kərəm Aktürkoğlunun yerinə yetirdiyi standart zərbələrin heç biri təhlükə yaratmadı. Ümumiyyətlə, ötən mövsümün ulduzlarından olan Aktürkoğlu hələ ki istənilən səviyyədə deyil. Komandanın standart vəziyyətləri yaxşı yerinə yetirə bilən bir oyunçuya ehtiyacı var. Çikıldaunun özünü qoruması və var gücü ilə oynamaması gözdən qaçmadı. Həm onun, həm də digər rumıniyalı Morutsanın komandadan ayrılmaq ehtimalı yüksəkdi.

'Sivasspor'' artıq Morutsana görə rəsmi təklif irəli sürüb. Sevindirici məqam isə Əmrə Akbaba və Yunus Akgünün yaxşı formada olmasıdı. Ötən mövsüm başqa klublarda icarədə olan hər iki oyunçunun yeni mövsümdə ''Qalatasaray''a böyük faydası dəyəcək. Elə Ayhan Akmanın oğlu, ''altyapı''da yetişən Həmzə Akman da çox istəklidi və yaxşı təsir bağışlayır. Çikıldau və Morutsandan başqa Saşa Buy ilə Aytac Kara da Okan Burukun planlarına daxil deyil. Bu futbolçular kimi Fatih Terimin dönəmində transfer edilən Berkan Kutlu ilə Barış Alpər Yılmazın da yeni mövsümdə start heyətinə düşmək şansı azdı. Ömər Bayramla da bu yay yolların ayrılacağı gözlənilir. Mustafa Məhəmədə görə sərfəli təklif gələcəyi təqdirdə isə forvardın satılacağı istisna olunmur.

ƏLİ