FİFA dünya çempionatının finalını Slavko Vinçiçə tapşırdı. 1979-cu il noyabrın 25-də Sloveniyanın Maribor şəhərində dünyaya gələn Vinçiç 2010-cu ildən FİFA hakimi dərəcəsi daşıyır. Beynəlxalq arenada müxtəlif yarışlar çərçivəsində 150-dən artıq oyun idarə edib. Təbii ki, bu müddətdə Azərbaycan klubları və yığmaları ilə də yolları kəsişib.

Bu tanışlığın tarixçəsi 2013-ün iyuluna gedib çıxır. Düz 13 il əvvəl – iyulun 18-də Vinçiç Avropa Liqasının 2-ci təsnifat mərhələsinin oyununda “Makkabi” ilə “Xəzər Lənkəran”ı meydana səsləyib. Hayfada keçirilən həmin oyunda meydan sahibləri 2:0 hesabıyla qalib gəlib, oyundakı yeganə sari vərəqə cənubluların müdafiəçisi Elnur Allahverdiyevə göstərilib.

Həmin ilin payızında, konkret oktyabrda ölkəmizin U-19 yığması İsveçdə AÇ-2014-ün seçmə mərhələsi çərçivəsində üç oyun keçirib. Yeniyetmələrin oktyabrın 10-da İrlandiyaya 0:2 uduzduğu, 12-də Bosniya və Hersoqovina ilə 0:0 etdiyi oyunlarda Vinçiç idarə edib. O, İrlandiya ilə oyunda Arif Əsədovun çalışdırdığı komandanın 5 oyunçusuna (Elvin Camalov, Şirməmməd Məmmədov, Adil Nağıyev, Ruslan Nəsirli, Budaq Nəsirov) sari vərəqə göstərib, hazırda “Neftçi”nin formasını geyən Elvin Bədəlovu 36-cı dəqiqədə meydandan qovub. Slovenyalı referi iki gün sonra keçirilən Bosniya və Hersoqovina ilə oyunda Namik Ələskərova sari vərəqə göstərib.

Vinçiçlə sonrakı iki görüş “Qarabağ”ın adı ilə bağlıdı. Ağdamlılar Avropa Liqasının 2015/16 mövsümünün qrup mərhələsinin son turunda “Anderlext”in qonağı olub. 1:2 uduzan “Qarabağ”ın 4 oyunçusu – Miçel, Riçard Almeyda, Dani Kintana və Samuel Armenteros sarı vərəqə ilə cəzalanıb.

Vinçiçin Azərbaycana birinci və sonuncu səfəri isə 4 il əvvələ təsadüf edib. Çempionlar Liqasının 2022/23 mövsümündə, konkret avqustun 17-də Plzen “Viktoriya”sını qəbul edən “Qarabağ” rəqibin müqavimətini qıra bilməyib – 0:0. Vinçiç bu oyunda İbraima Vacini 66-cı dəqiqədə sarı vərəqə ilə cəzalandırıb.

ORXAN