''Qalatasaray''la yanaşı, İstanbulun digər nəhəngi ''Beşiktaş'' da Avstriyada toplanış keçir və bu komanda da dünən bu yayın ilk yoxlama matçını keçirdi. ''Qartal'' İnsburk şəhərindəki ''Tivoli'' stadionunda ''Verder''lə üz-üzə gəlib. Qeyd edək ki, ötən mövsümü 2-ci bundesliqada keçirən Bremen təmsilçisi yeni mövsümdə elitada oynamağa haqq qazanıb. ''Qalatasaray''dan fərqli olaraq ''Beşiktaş'' fanatlarını sevindirməyi bacarıb. Valerien İsmael ilk dəqiqələrdən bu heyəti meydana buraxıb: Ərsin Destanoğlu, Rozye, Velinton, Nəcip Uysal, Montero, Umut Meraş, Souza, Fernandeş, Hasiç, Boyd, Cenk Tosun. İsmael fasilədə 3, 61-ci dəqiqədə isə 8 əvəzetmə olmaqla ikinci yarıda bütün oyunçuları əvəzləyib. Maraqlıdı ki, ''Qalatasaray'' hesabı açdığı halda məğlub olubsa, ''Beşiktaş'' əksinə, hesabda geri düşməsinə rəğmən, qalib gəlib. Oyunda bütün qollar fasilədən sonra vurulub. 48-ci dəqiqədə ''Verder'' Ərən Dinkçinin qolu ilə önə keçib. Amma əvəzetmələrdən sonra matçın gedişatı dəyişib. Xüsusilə də Əmirhan Delibaş özünü yaxşı tərəfdən göstərməyi bacarıb. 19 yaşlı futbolçunun 67-ci dəqiqədə qazandığı penalti Salih Uçanın hesabı bərabərləşdirməsi ilə nəticələnib. 10 dəqiqə sonra ''Qartal'' qələbə qolunu vurub. Əmirhanın keçidindən və ötürməsindən sonra Oğuzhan Akgün yekun nəticəni müəyyənləşdirib. ''Beşiktaş'' növbəti yoxlama oyununu iyulun 12-də Plzen ''Viktoriya''sına qarşı keçirəcək.