Hər üç klubumuz avrokuboklarda ilk mərhələni arxada qoydu. Bəs onlardan hansı yerli futbolçulara daha çox şans verdi?

“Sabah”ın müdafiəçisi Rəhman Daşdəmirov hər iki oyunda əvvəldən axıra qədər meydanda oldu. Rəhman hətta cavab görüşündə fərqləndi də. Aleksey İsayev Bakıda 77-ci, Osvestridə 82-ci dəqiqədə əvəzləndi.

“Qarabağ”ın “Vestri” ilə ilk oyununda Bədavi Hüseynov əsas heyətdə yer alsa da, 88-ci dəqiqədə əvəzləndi. Elvin Cəfərquliyev 65-ci dəqiqədə meydana çıxdı. Cavab görüşündə də Bədavi start heyətində idi, amma bu dəfə daha tez - 74-cü dəqiqədə əvəzləndi. Elə həmin dəqiqədə Elvin meydana çıxdı.

“Zirə”nin “Torpedo” ilə ilk oyununda Rəşad Sadıqov 5 yerli oyunçuya şans verdi. Aydın Bayramov “qartallar”ın qapısını sona qədər qorudu. Yeni transfer Amin Seydiyev və Qismət Alıyev də 90 dəqiqə meydanda olub. Kapitan məhsuldar ötürmə ilə yadda qaldı. 72-ci dəqiqədə İsmayıl İbrahimli, 88-ci dəqiqəsində Hacıağa Hacılı meydana çıxdı.

Aydın cavab görüşündə də rəqibin fərqlənməsinə imkan vermədi. Qismət və Amin Seydiyev də sona qədər oynadı. Seydiyev hətta rəqib qapısından top keçirə bildi. 75-ci dəqiqədə isə İsmayıl meydana çıxdı.

İSRAYIL XEYRULLAYEV