İyulun 7-dən Avstriyanın Qrats şəhərində toplanışda olan ''Qalatasaray'' dünən bu yayın ilk yoxlama oyununu keçirib. ''Cim-Bom'' yerli Qrats şəhərini təmsil edən ''Şturm''la üz-üzə gəlib. ''Merkur Arena''dakı qarşılaşmaya qürbətçi futbolsevərlər böyük maraq göstərib. Oyunu 7562 azarkeş izləyib. İstanbul nəhəngi meydana ideal heyətlə çıxmamışdı. Çünki Muslera, Nelsson, Çikıldau, Kərəm Aktürkoğlu, Yunus Akgün, Berkan Kutlu, Mustafa Məhəməd kimi hazırlığa gec qoşulan yığma üzvləri oyunda iştirak etmədi. Amma yenə də heyəti zəif saymaq olmaz. ''Aslan''ın ''11-liy''i belə idi: Okan Kocuk, Elabdellaui, Emin Bayram, Əbdülkərim Bardakçı, Van Anholt, Taylan Antalyalı, Aytac Kara, Morutsan, Əmrə Akbaba, Əmrə Kılınc, Oğulcan Çağlayan. Fasilədən sonra meydana gənc oyunçularla yanaşı, Dianye və Qomis kimi təcrübəlilər də çıxdı. Okan Burukun komandanın başında qeyri-rəsmi də olsa, ilk oyunu uğursuz alındı! Artıq 7-ci dəqiqədə Əmrə Akbabanın gözəl ötürməsindən sonra Oğulcan Çağlayan topu tora göndərdi. Amma qolun davamı gəlmədi. Əksinə, ''Şturm'' ikinci yarıda 3 dəqiqəyə matçın axarını öz xeyrinə dəyişdi. 54-cü dəqiqədə müdafiəçilərin uzaqlaşdıra bilmədiyi top Rasmus Hoylundun önünə düşdü və 19 yaşlı forvard bir toxunuşla hesabı bərabərləşdirdi. 3 dəqiqə sonra isə rəqibin güclü pressinqi zamanı Əbdülkərim Bardakçı kobud səhvə yol verdi. Bu epizod Hoylundun ikinci qolu vurması və yekun nəticəni müəyyənləşdirməsi ilə nəticələndi. ''Qalatasaray'' ikinci yoxlama oyununu iyulun 13-də ''Qəbələ''nin Konfrans Liqasındakı rəqibi ''Fehervar''a qarşı keçirəcək.