"Qarşımıza çempionluq məqsədi qoymuşuq" - Cenk Sümər
"Neftçi" növbəti mövsüm çempionluq olmaq istəyir.
"Football-plus.az" xəbər verir ki , bu barədə klubun baş icraçı direktoru Cenk Sümər jurnalistlərə açıqlamasında deyib. Funksioner "ağ-qaralar"ın 2026/27 mövsümündəki hədəflərindən söz açıb:
"Qarşımıza çempionluq məqsədi qoymuşuq. Klub dəyişiklikdən keçir. Təzə komanda qurmaq bir mövsümdə alınmır. Heyətə yeni oyunçular cəlb olunub. Axtarışlar davam edir. "Neftçi"nin 90-cı ilində çempion olmaq istəyirik. Avrokubokda da iddialıyıq. Çempion olmaq üçün əlimizdən gələni edəcəyik. Buna inanırıq".
Sümər ədalətli mövsüm keçməsini arzulayıb:
"Klublarımıza avrokuboklarda uğurlar arzulayıram. Təlim-məşq toplanışını başa vurmuşuq. Futbolçular çox sayda məşqlər edib. Yeni transferlər də var. Yoxlama oyunlarında meydana çıxdılar. Baş məşqç və futbolçular hər şeydən razıdı".
O, ötən mövsüm icarə əsasında heyətdə yer alan Freddi Varqası transfer etmək istədiklərini söyləyib:
"Varqası heyətə qatmaq istəyirik. Ötən mövsüm yaxşı təsir bağışlayıb. Danışıqlar davam edir. Müsbət yekunlaşacağına inanıram. Amma müqavilə imzalanmadan nəsə demək olmur".
Baş icraçı direktor avrokubokda liqa mərhələsinə vəsiqə qazanmaq istədiklərini vurğulayıb:
"Liqa mərhələsinə vəsiqə qazanmaq niyyətindəyik. Amma asan deyil. Bütün komandaların məqsədləri var. Avrokuboklarda yaxşı nəticələrə nail olacağımıza inanıram".
Xatırladaq ki, "Neftçi" Konfrans Liqasının 2-ci təsnifat mərhələsində "Dinamo-Minsk" ilə üz-üzə gələcək. Paytaxt təmsilçisi ilk matçını iyulun 22-də Bakıda keçirəcək. Cavab görüşü 30-da baş tutacaq.
Digər xəbərlər
