Hələ ki özünə yeni klub tapa bilməyən Yusuf Yazıcının gələcək taleyi ilə bağlı yeni bir iddia ortaya atılıb. Bilindiyi kimi, müqavilə ilə ''Lill''ə məxsus olan Yusuf ötən mövsümün ikinci dövrəsini ÇSKA-da keçirmişdi. Türkiyəli vinger 12 oyunda 8 qol vursa da, ''hərbçilər'' onu daimi əsasda transfer edə bilməmişdilər. 25 yaşlı oyunçunun meneceri Adəm Cebeci ''Fulhem'' və ''Nottingem Forest''lə danışıqlar apardığını etiraf etmişdi. Amma Türkiyə və İtaliya mətbuatının yazdığına inansaq, Yazıcı karyerasını A seriyasında davam etdirəcək. Belə ki, onun ''Salernitana'' ilə anlaşdığı deyilir. Bu klubun idman direktoru Morqan De Sanktis ''Lill'' ilə danışıqların son mərhələsinə qədəm qoyub. Amma Yusufun İtaliya klubuna daimi əsasda, yoxsa icarə əsasında keçəcəyi bilinmir. ''Trabzonspor'' da məsələni diqqətlə izləyir. Çünki ''Lill''in bu satışdan əldə edəcəyi məbləğin 20 faizi məhz trabzonlulara çatacaq. Bu komandanın yetirməsi olan Yusuf 2019-un yayına 17,5 milyon avroya ''Lill''ə transfer olunmuşdu.