“Qarabağ”ın “Vestri” ilə ev oyununa gələn tamaşaçı sayı Avropanı təəccübləndirdi. Belə ki, həmin həftə Avropanın heç bir stadionunda avrokubok oyununa Bakıdakı qədər – yəni 23549 tamaşaçı toplaşmamışdı. Ağdam klubu azarkeş sevgisinə yaxşı nəticə ilə cavab verdi – İslandiya təmsilçisini həm evdə, həm də səfərdə darmadağın etdi.

Azərbaycanın avrokuboklardakı qüruru növbəti sınaq ərəfəsindədi. ÇSKA “Vestri”dən qat-qat təcrübəli və titulla komandadı, “hərbçilər” qitə turnirlərində zəngin təcrübəyə malikdi. Üstəlik bolqar azarkeşlərin Bakıya səfərinə icazə verilsə, biz onların tribunalarda da təşəbbüsü ələ almaq cəhdini görəcəyik. Kəsəsi, iyulun 23-də - ÇSKA ilə oyun günü Tofiq Bəhramov adına stadionda – “Qarabağ”ın yanında olmaq lazımdı. Qurban Qurbanov və yetirmələri, yenilənmiş “Qarabağ” ciddi, güclü və çılğın dəstəyə ehtiyac duyur!

Onu da xatırladaq ki, ÇSKA ilə oyunun biletləri srağagün saat 15.00-da satışa çıxarılıb. Standart biletlərin qiymətləri 5, 10, 15 və 20 manatdı.
Biletləri yalnız "iticket.az"ın rəsmi saytı və mobil tətbiqi vasitəsilə əldə etmək olar. Onlayn bilet alışı zamanı çətinlik yaranarsa, azarkeşlər "iticket.az"ın satış məntəqələrinə, “Park Bulvar”dakı “Qarabağ” Fan Şopuna və Tofiq Bəhramov adına Respublika stadionunun kassalarına müraciət edə bilərlər.
Klub həmçinin azarkeşlərə saxta biletlərə aldanmamağı tövsiyə edir. Stadiona giriş yalnız etibarlı QR kodlu biletlə mümkündü.