DÇ-2022-yə qatılmaq uğrunda pley-off matçlarına hazırlaşan Türkiyə yığmasında baş məşqçi Ştefan Kunts 27 nəfərlik heyəti açıqlayıb.

Gözlənildiyi kimi bu dəfəki siyahıda bir sıra dəyişikliklər var. Adı son siyahıda yer almayan futbolçulardan Sərdar Əziz, Yusuf Yazıcı, Dorukhan Toköz və Enes Ünal bu dəfə yığmaya dəvət alıblar. 3 futbolçu isə karyeralarında ilk dəfə yığmaya çağırılıblar. Söhbət hazırda bombardirlər yarışında 2-ci pillədə qərarlaşan və 29 superliqa matçında 14 qol, 6 məhsuldar ötürməlik performansla diqqət çəkən ''Kasımpaşa''nın 25 yaşlı forvardı Umut Bozok, eləcə də müqavilə ilə ''Qalatasaray''a məxsus olan ''Adana Dəmirspor''lu Yunus Akgün və ''Antalyaspor''lu Doğukan Sinikdən gedir. Xatırladaq ki, qardaş ölkə martın 24-də ilk pley-off matçında səfərdə Portuqaliya ilə qarşılaşacaq. ''Ay-ulduzlular'' qalib gələcəkləri təqdirdə martın 29-da Konyada həlledici oyunda İtaliya - Şimali İrlandiya matçının qalibi ilə üz-üzə gələcək.

Türkiyə Portuqaliya səddini aşa bilməsə İtaliya - Şimali İrlandiya cütünün məğlubu ilə yoldaşlıq matçı keçirəcək. Amma bu oyunun dəqiq tarixi hələ ki, bəlli deyil. Sonda yığmaya dəvət alan oyunçuların siyahısını təqdim edirik: qapıçılar - Uğurcan Çakır (Trabzonspor), Altay Bayındır (Fənərbaxça), Sinan Bolat (Gent); müdafiəçilər - Zəki Çəlik (Lill), Mərt Müldür, Kaan Ayhan (hər ikisi ''Sassuolo''), Çağlar Söyüncü (Lester), Merih Dəmiral (Atalanta), Ozan Kabak (Norviç), Sərdar Əziz (Fənərbaxça), Canər Ərkin (Fatih Karagümrük), Rıdvan Yılmaz (Beşiktaş); yarımmüdafiəçilər - Abdülkadir Ömür, Dorukhan Toköz (hər ikisi ''Trabzonspor''), Yunus Akgün (Adana Dəmirspor), Kərəm Aktürkoğlu, Berkan Kutlu, Taylan Antalyalı (hamısı ''Qalatasaray''), Doğukan Sinik (Antalyaspor), Cengiz Ündər (Marsel), Orkun Kökçü (Feyenoord), Hakan Çalhanoğlu (İnter), Yusuf Yazıcı (ÇSKA); hücumçular - Burak Yılmaz (Lill), Enes Ünal (Xetafe), Sərdar Dursun (Fənərbaxça), Umut Bozok (Kasımpaşa).