“Ötən mövsümün sonunda əbəs yerə karyerasını bitirmədi”.

“Formula-1” üzrə dünya çempionatında hər mərhələdən sonra nəticələrin geniş müzakirə olunması təbiidi. Həftəsonu keçirilən Emiliya-Romanya mərhələsi də istisna olmadı. “Mersedes”in rəhbəri Toto Volf pilotlarının çıxışı haqda danışıb. Xatırladaq ki, Lüis Hemilton 14-cü yeri tutub, Corc Rassell finişə 4-cü çatıb: “Bilirsizmi, mən Hemiltonu müdafiə etməliyəm. Bu onun aşağı səviyyəsindən yox, maşının göstəricilərindən xəbər verir. Lüis dünyanın ən yaxşı pilotudu, sadəcə, yüksək yerlər uğrunda mübarizə aparmaq üçün maşını yoxdu. Gerçəkdən ağlıma gələn bütün dahi idmançılar arasında eləsi yoxdu ki, karyerasında hər şey istədiyi kimi getsin. Hemiltonla bağlı da belədi. Yaxşı və pis günlərdə bir yerdəyik”.

Britaniyalı pilot özü də İtaliya mərhələsi ilə bağlı açıqlama verib: “Bütün komanda ilə birgə eyni gəmidəyik. Bu gün ən azı Rassell komandaya bir neçə xal qazandırdı. Xal qazana bilmədiyimə görə hamıdan üzr istəyirəm. Dediyim kimi, komandada hər kəs başını qaldırmadam əlindən gələni edir. Heç kim təslim olmur və irəliləməyə çalışacağıq”.

“Red Bull”un idman məsləhətçisi Helmut Marko isə Hemiltonun nəticəsini lağa qoyub: “Qulaq asın, biz ki onu bir dövrə arxada qoymuşuq. Ötən mövsümün sonunda əbəs yerə karyerasını bitirmədi”.
Xatırladaq ki, İtaliya mərhələsinin qalibi “Red Bull”un pilotu Maks Ferstappen olub, onun komanda yoldaşı Serxio Peres finişə ikinci çatıb.
Bu arada “Alpin”in pilotu Fernando Alonso karyerasını nə vaxt bitirəcəyi ilə bağlı suala cavab verib: “Hiss edirəm ki, başqalarından yaxşıyam. Başqalarının məni sırf ustalıq hesabına qabaqladığını görsəm, bunu etiraf edəcək, başqa nələrsə düşünəcəm. Hazırda tam fərqli düşünürəm, yarışmaq xoşuma gəlir”.

Yayda 41 yaşını tamamlayacaq ispanın “Alpin”lə müqavilə müddəti 2022 mövsümünün sonunda bitəcək.

Bildiyiniz kimi, bu il “Formula-1” komandalarının büdcəsinə tavan qoyulub, yəni onlar 21 mərhələ üçün maksimum 140 milyon xərcələyə bilər. Ancaq bəzi məhsullarının qiymətinin qalxması üzündən nəhəng komandalar xərcləri məhdudlaşdırmaqda çətinlik çəkir. Belələri tavanın bir qədər qaldırılması və başqa düzəlişlərin edilməsi yönündə fəal şəkildə mövqelərini çatdırırlar. “Formula-1”in icraçı direktoru Ross Braun qeyd edib ki, bu məsələni həll etmək lazım gələcək: “Düşünürəm ki, inflyasiyanın artım sürətini nəzərə alıb, vəziyyətə yenidən baxmaq lazımdı. Ona görə ki, bu qaydalar hazırlanarkən inflyasiya yetərincə aşağı və proqnozlaşdırılan həddə idi. İndi isə vəziyyət yenidən dəyişib. Bu üzdən komandaların narazılığını müəyyən mənada haqlı sayıram”.

"Formula 1" komissiyasının iclasından sonra Beynəlxalq Avtomobil Federasiyası (FIA) 2026-cı il mövsümü üçün dünya çempionatının bolidlər baxımından texniki reqlamentinin yaradılacağı prinsipləri açıqlayıb. FIA avtomobillərin ölçülərinin kiçildiləcəyini və çəki artımının dayandırılacağını bildirib. Qərara əsasən, bolidlər ətraf mühitə uyğun və səmərəli olacaq. Avtomobillər arasında sıx rəqabət və onların daha da təkmilləşdirilməsi nəzərə alınacaq.
FIA xərcləri azaltmaq üçün strateji cəhətdən seçilmiş komponentlərin standartlaşdırılması və sadələşdirilməsi işini davam etdirəcək. Həmçinin ekoloji cəhətdən təmiz materialların və ya texnologiyaların istifadəsi genişləndiriləcək. Bundan əlavə, onların yenidən istifadəyə yararlığına diqqət yetiriləcək. Qurum bolidlərin təhlükəsizliyini yaxşılaşdırmağa yönəlmiş işləri də davam etdirəcək.