Çempionatın ilk 6 oyununda bir xal belə qazana bilməyən “Kəpəz” Adil Şükürovla yolları ayırıb, Azər Bağırovla müqavilə bağladı. “Kəpəz” mövsümə böyük hədəflərlə başladı, mövsümün sonunda elitada qaldığına görə sevindi.

Klubun əsas fanat qrupu olan “Xəmxə”nin rəhbəri Müşfiq Məmmədov sonuclarla bağlı “Futbol+”ə müsahibə verdi. 

- Mövsümü “Kəpəz” üçün necə dəyərləndirirsən?
- Uğursuz mövsüm oldu. “Kəpəz” elitada qalmağa sevinməli olan komanda deyil. Rəhbərlik dəyişdi, sponsor gəldi, biz gözlədik ki, komanda uğurlu olar. Gələnlər komandanı dağıtdı, seleksiya işini görən Erkin İbrahimovla Adil Şükürov komandanı məhv etdi. Bilmirəm razılaşdılar, nə etdilər, yaxşı oyunçunu göndərib, daha keyfiyyətsizlərini gətirdilər. 6 oyundan sonra Adil Şükürov getdi, Azər Bağırov gəldi, inanırdıq ki, komandanı liqada saxlayacaq. Sağ olsun. Komanda Gəncədə oynamadı deyə, azarkeş təzyiqi görmədi. “Qarabağ”a qalib gələndən sonra uğursuz zolaq yarandı. Çünki azarkeş təzyiqi yox idi. Gözləntimiz 15 min azarkeşin qabağında uğurlu nəticələr görməkdi. 

- Azər Bağırovun gedişini gözləyirdiz?
- Xeyr. Gözləyirdik ki, qalar, seleksiya aparar. Son iki mövsümdə komandaya sonradan gəlib. Düşünürdük ki, onun da seleksiyasını görərik (gülümsəyir). Azarkeşlər də Azəri çox istəyirdi. Onun gedişi nə qədər gözlənilməz idisə, o qədər də gözlənilən idi. Adama tələbat var idi. Təkliflər gəldi, burda qalmaq istəmədi, bəlkə razılaşmadı.

- Oyunun sonlarında Azər Bağırovun ünvanına təxribat xarakterli şüarlar səsləndirdiz. Bu ona münasibətdə haqsızlıq deyil?
- İstədiyimizdən o şüarları səsləndirdik. Məsəl var ki, adam umduğu yerdən küsər. Biz həmişə ona dəstək olmuşuq. Getməsini istəmirdik. 

- Baş məşqçinin yerli və ya əcnəbi olmasının “Kəpəz” azarkeşi üçün fərqi var?
- Bizə azı 3 il sabit qala biləcək məşqçi lazımdı. İşini görsün, təzyiqlərə dözə bilsin. 

- Azər Bağırov rəhbərliyin yeni müqavilə təklif etdiyini dedi. Yəni özü gedir. Buna görə ondan incimirsiz?
- Azarkeşə görə qalmalıydı. Qalan məsələlər rəhbərliklə məşqçi arasında olan məsələdi. 

- Jorj Kaşkilyanın da komandaya gələcəyi deyilir.
- Yox, onu istəmirik.

MÜZƏFFƏR QULUZADƏ