“Kutaisililər 1990-cı illərdəki internet qədər yavaş idi” - “Zirə” gürcü jurnalisti dəhşətə gətirdi
Düzdü, “Sabah”ın Çempionlar Liqasında, “Qarabağ”ın Avropa Liqasında mövsümə qələbə ilə başlayacağı əvvəlcədən bəlli idi. Çünki “Nyu Seynts”in “bayquşlar”dan, “Vestri”nin “köhlən atlar”dan xeyli zəif olduğu bilinirdi. Bu üzdən həmin qələbələr, demək olar ki, heç kimi təccübləndirmədi. Ancaq “Zirə” sözün əsl mənasında sürprizə imza atdı. Təbii ki, “qartallar”ın “Torpedo”nu məğlub etmək ehtimalı var idi. Sadəcə, Rəşad Sadıqovun komandasının mövsümü ilk “dördlük”dən kənarda başa vurması, ölkəmizi avrokuboklarda təmsil edəcəyini iyunun 15-də öyrənməsi, artıq həmin vaxta kimi bir neçə aparıcı futbolçu ilə yollarını ayırması kimi məqamlar kollektivin əleyhinə işləyirdi. “Zirə” bütün bədbin proqnozları alt-üst etdi. Hətta böyükhesablı qələbə sayəsində cütün taleyini həll etdi də deyə bilərik. Əlbəttə, belə uğur hər birimizi sevindirdi.
Maraqlıdı, bəs, “Torpedo”nun ağır məğlubiyyəti Gürcüstanda necə qarşılanıb? Axı Kutaisi təmsilçisi rəqibi ilə müqayisədə daha zəngin avrokubok təcrübəsinə malikdi. Bu suala cavab tapmaq üçün sizi matçdan sonra bəzi Gürcüstan saytlarında yer alan yazılarla tanış edirik.
“Lagazzetta.ge”:
“Təəssüf ki, “Torpedo” bizə öz oyununu təqdim edə bilmədi. “Zirə” oyun ərzində böyük üstünlüyə malik idi və bundan faydalanaraq 3:0 hesabıyla qalib gəldi. Rəqibin heyətində gürcü hücumçular Davit Volkovla Georgi Papunaşvili də forma geydi”.
“Sportall.ge”:
“Torpedo” ilk iyunda böyük hesabla uduzdu və növbəti mərhələyə yüksəlmək şansını, demək olar, bitirdi. Rəqib əvvəldən axıra qədər təşəbbüsə sahib oldu. İlk hissədə bir, qalan vaxtda iki qol vuran Azərbaycan komandası inmalı qələbə qazandı”.
Maraq üçün qeyd edək ki, “sportall.ge” saytında yer alan xəbərin rəy bölməsində fikirlərini qeyd edən gürcü azarkeşlər Volkovla Papunaşvilinin keyfiyyətli hücumçular olduqlarını, klublarının legionerlərə yox, məhz bu futbolçular üçün pul xərcləmələrinin daha düzgün olacağını bildiriblər.
“Lelo.ge” saytının Sumqayıta ezam olunmuş reportyoru Serqo Kordzaya da “Torpedo” haqda tənqidi fikirlər səsləndirib. Meydanda baş verən hadisələrin axarını hazırladığı məqalədə nəql edən həmkarımız Kutaisi təmsilçisinin belə oyunla avrokuboklarda irəli getməsinin mümkünsüz olduğunu yazıb:
“Bir çox hallarda Gürcüstan klublarının uğursuzluqlarını həzm etməyə çalışırıq. Ancaq bu dəfə vəziyyət daha pis oldu. Orta səviyyəli Azərbaycan komandası “Torpedo”nu darmadağın etdi. Matçı kənardan izləyən istənilən şəxs “Torpedo”nun çox uzağa gedə bilməyəcəyini anlayardı. “Zirə” normal komandadı. Bəs, biz hardayıq? Dirk Şusterin yetirmələri oyuna özünəməxsus zəif müdafiə futbolu ilə başladı və məqsədə əks-hücumlarla çatmağa çalışdı. Belədə oyun ərzində cəmi iki-üç təhlükəli vəziyyət yarada bildilər. Başqa heç nə. “Zirə” ilk 20 dəqiqədə “Torpedo”nun bütün sirlərini ifşa etdi. Qarşı tərəf anladı ki, Kutaisi təmsilçisi “çərçivə”ni qorumaq gücündə deyil. İlk qoldan sonra rəqibdən həqiqətən də güclü olduğunu görən meydan sahibləri ardıcıl hücumlarla sona qədər daha iki qol vurdu. Azərbaycan komandası gürcülərin liderlərini ustalıqla zərərsizləşdirdi. Rəqib həm də sürətinə görə “Torpedo”nu xeyli qabaqladı və daha cəsarətli oynadı. Bizimkilər isə təəssüf ki, topu asanlıqla itirməklə, hücum qura bilməməklə məşğul idi. Ən yaxşı komandalarımızdan birini belə vəziyyətdə görmək çox ağrılı idi. Ancaq “Zirə”nin müdafiə xəttində kifayət qədər boşluqların olduğunu, Dirk Şusterin komandasının bundan istifadə edə bilmədiyini də qeyd etməliyik. Biz dünya çempionatında müasir futbol trendlərini görürük. Onları mənimsəməliyik, ancaq “Torpedo” bunu bacarmır. Kutaisililər 1990-cı illərdəki internet qədər yavaş idi. Etiraf etməkdən qorxuruq. Amma yazmağa məcburuq ki, bu cütdə növbəti mərhələnin iştirakçısı artıq müəyyənləşib. Bu fəlakətdi!”
KƏNAN BAHADIR
Digər xəbərlər
