“Sabah” sabah Çempionlar Liqasının 1-ci təsnifat mərhələsinin cavab oyununa çıxacaq.

“Nyu Seynts”in çalışdırıcısı Kreyq Harrison bu gün mətbuat konfransı keçirib.

- İlk oyundakı məğlubiyyətdən sonra komandada vəziyyət və əhval-ruhiyyə necədi?
- Hər şey qaydasındadı. Biz dərk edirik ki, "Sabah" çox yaxşı komandadı. "Qarabağ" kimi Çempionlar Liqasında uğurla çıxış edən bir komanda ilə rəqabət aparırlar və onlara qarşı belə nəticələr göstərirlərsə, deməli, zəif ola bilməzlər. Onların çox yaxşı oyunçuları və təcrübəli baş məşqçisi var. Məğlubiyyətə rəğmən, komandamın təşkilatçılığı, əzmkarlığı və fədakarlığı məni sevindirdi. Bəlkə də istədiyimiz qədər hücum edə bilmədik.

- İlk oyunda topa daha çox "Sabah"ın sahib olacağını gözləyirdiz. Sabahkı matçdan gözləntiniz necədi?
- Bəli, bu dəfə rəqibin topa o qədər də çox sahib olmayacağını gözləyirəm. Lakin onlar topa nəzarət etməyi sevən komandadı, ona görə də yenə müəyyən üstünlükləri ola bilər. Oyun planımız bu dəfə fərqli olacaq, topla daha çox oynamağa və imkanlar yaratmağa çalışacağıq. Topa sahib olmaq güclü göstəricidi, amma yekunda hər şeyi qapıya zərbələr həll edir. Evdə daha çox hücum etməyi və onları təzyiq altında saxlamağı planlaşdırırıq. İlk qolu biz vursaq, hər şey dəyişəcək.

- İlk matçdan hansı dərsləri çıxardız? Oyuna tam hazırsız?
- Futbolda həmişə nəsə öyrənirsən. Nəyi daha yaxşı edə biləcəyimizi təhlil etdik. Məşqçilər heyəti ilə saatlarla bunun üzərində çalışmışıq. Müsbət və mənfi məqamları qeyd etmişik. Geriyə qayıdarkən yol bizim üçün yaxşı keçmədi. Yolda 18-20 saat vaxt itirdik. Hava limanlarında çox gözlədik. "Sabah" isə yəqin ki, çarter reysi ilə birbaşa gələcək. Lakin artıq o yorğunluğu geridə qoymuşuq, dincəlmişik və hazırıq. Sabah yalnız bəzi kiçik xatırlatmalar edib, meydana çıxacağıq və ilk qolu vurmağa çalışacağıq.

- İlk oyundan öncə heyətdə zədəli futbolçular var idi. Onlardan sabahkı matçda iştirak edənlər olacaq?
- Xeyr, Ben Vilson, Bred Yanq, Denni Devis, Adam Vilson, Rori Holden və Ceykob sabah oynamayacaqlar. Ümid edirik ki, növbəti mərhələyə qədər sağalarlar. Onlar bizim üçün çox vacib oyunçulardı. Səfər matçında ehtiyat oyunçular skamyamız çox gənc və təcrübəsiz idi. Demək olar ki, ümumilikdə 50-dən az oyun təcrübələri var idi. Evdə bəlkə də gənclərə şans vermək daha asan olar, amma səfərdə onları belə böyük təzyiq altına atmaq və səhv etmək ehtimallarını artırmaq ədalətli olmazdı.

- Avrokuboklarda evdə oynamaq sizin üçün həmişə üstünlük olub. Son 7 Avropa oyununun yalnız ikisində uduzmusuz. Rəqiblər üçün burda oynamaq niyə bu qədər çətindi?
- Düşünürəm ki, bu, həm bizim oyun üslubumuz, həm də meydança ilə bağlıdır. Etiraf edək ki, Avropada süni örtüklü meydançalar o qədər də çox deyil. Biz isə hər gün burda məşq edir və oynayırıq. Topun quru və ya yaş havada necə hərəkət etdiyini çox yaxşı bilirik. Futbolçularımız özlərini burda rahat hiss edirlər. Biz evdə doğrudan da təhlükəli rəqibik və bunu sabahkı matç üçün böyük müsbət hal kimi dəyərləndiririk.

- Bu statistika və meydan amili komandaya necə təsir edir?
- Evdə oynayırıq, 2 top fərqi ilə geridəyik və ilk qolu bizim vurmağımız mütləqdi. Bu qolu 1-ci dəqiqədə, yaxud 80-ci dəqiqədə də vura bilərik. 80 dəqiqə ərzində ilk qolu vura bilsək, oyun tam yenidən başlayacaq. Əsas məqsədimiz də məhz budu.