Con Durandan həm şərtlərin uyğun gəlməməsi, həm də baş məşqçi Okan Burukun istəməməsi üzündən vaz keçən ''Qalatasaray'' bu yayın ilk transferini rəsmiləşdirmək üzrədi.

Türkiyə çempionu Lesli Uqoçukvu ilə anlaşıb. 22 yaşlı mərkəz yarımmüdafiəçisi ilə ilkin anlaşma əldə olunduqdan sonra onun şərəfini qoruduğu ''Bernli'' ilə də anlaşmaq mümkün olub. Fransalı futbolçu ''Renn''in yetirməsidi və ulduzu da məhz bu klubda parlayıb. Daha sonra ''Çelsi''də və icarə əsasında ''Sauthempton''da çıxış edib.

''Bernli'' onu ötən yay ''Çelsi''dən 28,5 milyon avroya transfer etmişdi. Maraqlıdı ki, bu klub ''Qalatasaray''dan danışıqların əvvəlində məhz elə bu rəqəmi tələb edib. Ancaq ''Cim-Bom'' mövsümün sonunda Uqoçukvunu daimi əsasda transfer etmək hüququnu ələ keçirmək şərti ilə onu birillik icarəyə götürməyi təklif edib. Bunun üçün qarşı tərəfə 5,5 milyon funt sterlinq, yəni 6,4 milyon avro icarə haqqı təklif olunub. ''Bernli'' bu şərtlərlə razılaşıb.

Bu klubun bu oyunçuya görə ''Çelsi''yə ödəməli olduğu məbləğin məhz elə bu qədər hissəsi qalmışdı. Müəyyən şərtlər yerinə yetirilsə, ''Qalatasaray'' mövsümün sonunda ''Bernli''yə daha 20 milyon funt sterlinq, yəni 23,4 milyon avro ödəyərək istedadlı futbolçu ilə daimi müqavilə imzalayacaq.

Şayiələrə inansaq, bunun baş verməsi üçün nigeriyaəsilli fransalı futbolçu ''sarı-qırmızılar''ın heyətində ən azı 25 rəsmi oyuna çıxmalıdı. Tanınmış insayder Fabritsio Romano da bu futbolçunun tezliklə Türkiyəyə gələrək müqaviləyə imza atacağını təsdiqləyib.

''Bernli'' bilindiyi kimi ötən mövsüm premyer-liqada oynasa da, yerini qoruya bilməyərək çempionşipə yuvarlanıb. Uqoçukvu 38 rəsmi oyunda forma geyərək aktivinə 3 qol, 2 məhsuldar ötürmə yazıb.