Mayın 26-da Saşa İliçlə yolları ayıran “Sumqayıt”, nəhayət, yeni baş məşqçinin adını açıqladı. Məlum oldu ki, “kimyaçılar”ı növbəti mövsüm Filipe Kandido çalışdıracaq.

Düzü, “gənclik şəhəri”nin axtarışı uzun çəkdiyindən klubun daha təcrübəli, ambisiyalı və uğurlu mütəxəssislə anlaşmağa çalışdığını düşünmək olardı. Lakin klub bu baxımdan ümidləri doğrultmadı. Ona görə ki, Kandido heç də ciddi uğurları olan məşqçi deyil.

“Football-plus.az”ın məlumatına görə, portuqaliyalı indiyə qədər “Sousense” (2013-cü ildə futbolçu karyerasını başa vuran futbolçu məhz həmin vaxt bu komandanın baş məşqçisi təyin edilib – red.), “Salgueiros”, “Leyria”, “Mafra”, B SAD, “Nasyonal”, “Boavişta”və “Pasuş Fereyra” kimi komandaların “sükanı arxasında” olub. Kandidonun avrokubok təcrübəsi yoxdu. Mütəxəssis hər klubda orta hesabla 8 ay çalışıb. 46 yaşlı məşqçi komandalarını meydana daha çox 3-4-3 sxemi ilə çıxarır.

İnsaf naminə mütəxəssisin futbolçu karyerasının qismən uğurlu olduğunu deməliyik. Portuqaliyanın U-21 yığmasının üzvü olmuş Kandido “Real”ın B komandasının da formasını geyib. O, “Sportinq”in yetirməsi olub.

Görünür, “Sumqayıt” məşqçi seçimi ilə həm də avrokuboklar uğrunda mübarizə aparmayacağının mesajını verdi. Görək, Kandido da ölkəmizdə bir il çalışandan sonra evə cibidolu qayıdan əcnəbilərdən olacaq, yoxsa bizi yaxşı mənada təəccübləndirəcək?

KƏNAN BAHADIR