Gələn mövsümdən yeni stadionda oynayacaq “Kəpəz”də yenə də baş məşqçi dəyişikliyi ola bilər.

Belə ki, Gəncə klubunun rəhbərliyi vaxtı ilə “Xəzər Lənkəran”ı çalışdırmış Mirça Rednikin xidmətində maraqlıdı. Bəs belə davranış nə dərəcədə düzgündü? “Kəpəz” rəhbərliyi ardıcıl üçüncü dəfə eyni səhvi edəcək? Nəyə görə üçüncü?

2022/23 mövsümün əvvəlində aşkar autsayder olan “Kəpəz” Tərlan Əhmədovu baş məşqçi postuna gətirdi. Qərblilər həmin mövsümü 8-ci pillədə tamamladı. Mövsümün sonunda isə gözlənilmədən Tərlan Əhmədov istefaya göndərildi. “Kəpəz” azarkeşləri rəhbərlikdən israrla gəncəli mütəxəssis tələb etdi. Ötən mövsümün əvvəlində də sonuncu pillədə gedən “Kəpəz” vəziyyətin yaxşı olmadığını görüb Adil Şükürovu gətirdi. Adil Şükürov “Qəbələ”ni geridə qoyub, mövsümü 9-cu pillədə bitirdi. Eyni qaydada Şükürovu da bəyənməyən klub rəhbərliyi bu mövsüm Azər Bağırovu gətirdi. Azər Bağırov da kiçik büdcə ilə, yaxşı oyun göstərməklə, demək olar ki, komandanı premyer-liqada saxlayıb. “Neftçi” ilə oyundan sonra mətbuat konfransında Bağırovun komandadan incidiyi hiss olundu. Rednikin gəlməsi ilə bağlı sualın cavabında “lap yaxşı, nəsə demək istəmirəm” dedi.

Rednik xəbərləri niyə var? Niyə “Kəpəz” rəhbərliyi ilə anlaşdığını deyib? Od olmayan yerdən tüstü çıxmaz axı. Azər Bağırovun komandası bu mövsüm 7 qələbə qazanmaqla 29 xal toplayıb. “Sumqayıt”dan da cəmi 1 xal geridədi. Qarşıdakı mövsümdə klubun büdcəsinin artırılacağı ehtimalı da var. “Kəpəz” iddialı, ən azı orta pillələrdə olmaq üçün mübarizə aparmaq istəyirsə, Azər Bağırovdan yaxşı seçim görünmür. Çünki həm çempionata, həm də komandasına bələddi.

Rednikin tanıdığı Azərbaycan çempionatından isə əsər-əlamət qalmayıb. Çünki rumıniyalı düz 14 ildi ölkəmizin futbolundan uzaqdı. 6-7 il əvvəl gedən Roman Qriqorçuk dönüşündə baş çıxara bilmədi. Rednik nə edəcək? “Kəpəz” rəhbərliyi Azər Bağırova güvənsə, hər il daha da “artıran” komanda görə bilərik.

MÜZƏFFƏR QULUZADƏ