Hələ “futbol ili” davam edərkən ciddi dəyişikliklərin olacağının mesajını verən baş məşqçi Qurban Qurbanov futbol ictimaiyyətini yanıltmadı. Ağdamlılar mövsümlərarası fasilədə nə az, nə çox - 8 futbolçu ilə yollarını ayırdı. Daha bir önəmli məqam isə “köhlən atlar”ın həm də 8 yeni futbolçu almasıdı. Özü də söhbət əvvəlki mövsümlərlə müqayisədə yetərincə baha oyunçulardan gedir. Martin Zlomisliçin qapıçı, Bruno Lanqanın müdafiəçi, Renaldo Sefas, Jali Muaddib, Samuel Lobato, Bense Varkonyi və Cebrail Makreçkisin yarımmüdafiəçi, Zakaria Savonun hücumçu olduğunu nəzərə alsaq, ağdamlılar bütün mövqeləri gücləndirdi. Təbii ki, bu addımı atmaqda komandanın Çempionlar Liqasında qazandığı uğurlar sayəsində əldə etdiyi böyük maliyyə gücünün də rolu oldu. Əlbəttə, azarkeşlər belə transferləri yalnız sevinclə qarşılayır, ümidlər böyüyür, gözləntilər artır. Amma futbolun başqa üzü də var ki, həmin məqamda qaş düzəldən yerdə göz çıxarmaq tam mümkündü. Axı “köhlən atlar”ın məqsədi hər il olduğu kimi, bu dəfə də avrokubokların əsas mərhələsinə vəsiqə qazanmaqdı və belə köklü dəyişiklik böyük risklər yarada bilər. Düzdü, bir daha vurğulamalıyıq ki, həm “Qarabağ”ın klub kimi, həm də Qurban bəyin fərdi baxımdan təcrübəsini gözardı edə bilmərik. Hələ onu demirik ki, Mateuş Koxalski, Bədavi Hüseynov, Bəhlul Mustafazadə, Mateus Silva, Elvin Cəfərquliyev, Abdulla Zubir, Leandro Andrade, Marko Yankoviç, Kadi Borges və Kamilo Duran və başqa bir neçə istəkli, avrokubok təcrübəsi zəngin olan futbolçular hələ də heyətdədi.
Bəs, 8 ayrılığın yaşanması kollektiv üçün ciddi silkələnmə deyilmi? “Qarabağ”ın bu səbəbdən uğursuzluğa düçar olmaq ehtimalı varmı? Bu suallarla təcrübəli mütəxəssis Aslan Kərimova müraciət etdik:
“Bu qədər oyunçunun dəyişməsi komandaya təsirsiz ötüşə bilməz. Amma hansısa futbolçu komandadan ayrılmaqda israrlıdısa, təbii ki, başqa oyunçuyla anlaşmağa məcbursan. Belə dəyişikliklər həm müsbət, həm də mənfi nəticələnə bilər. Burda bir çox məqam var. Birincisi, “Qarabağ” indiyə qədər qazandığı reytinq sayəsində avrokubokların əsas mərhələsinə qədər ciddi rəqiblə qarşılaşmayacaq. “Vestri” İslandiyanın 2-ci liqa təmsilçisidi. Bu rəqibi premyer-liqamızda olan istənilən komanda məğlub edə bilər. İnanmıram ki, pley-off mərhələsində də güclü rəqib gəlsin. Yeni oyunçulara da kifayət qədər böyük vəsait xərclənib. Bu futbolçularla avrokubokların istənilən turnirinin əsas mərhələsinə vəsiqə qazanmaq olar. Təbii ki, oyun keyfiyyəti, zəkası baxımından ötən mövsüm Çempionlar Liqasında çıxış edən “Qarabağ”ı görməyəcəyik. Yenə də bu məqamın “köhlən atlar” üçün hansısa sərhəd yaradacağını düşünmürəm”.
KƏNAN BAHADIR
