"Bu gün futbol ictimaiyyəti, xüsusən də "Turan Tovuz" azarkeşləri və əməkçiləri üçün əlamətdar gündür. "Hünər" Təlim Məşq Bazası komandamızın nailiyyətləri üçün çox önəmli mərhələdi. Təbii ot örtüklü meydançada məşq etmək, oyunlara hazırlaşa bilmək komandanın işini bir az da asanlaşdıracaq. 5 hektarlıq ərazidə daha iki meydança və otel kompleksinin inşasını nəzərdə tuturuq. Baza "Huner Group"a məxsus ərazidə inşa edilib və "Turan Tovuz"un istismarına veriləcək. Bunu gələcəkdəki xərclərə qənaət etmək nöqteyi-nəzərindən bir mərhələ olaraq görürük. "Turan Tovuz" olaraq oturub fikirləşdik ki, keçici nailiyyətlərə yox, məhz struktura önəm verməliyik. Bu yay Tovuzda da meydançaların salınmasına başlayacağıq. İdman mediası tərəfindən bu qədər geniş diqqət bizi xüsusən sevindirir".

"İlkin mərhələdə nəzərdə tutmuruq. Daha iki meydança və otel kompleksi inşa olunandan sonra burada əməkdaşlar işləyəcək. Bu da klub üçün ciddi maliyyə yüküdür. Buranın özü- özünün istismar xərclərinin çıxarması üçün digər klublara da icarəyə verəcəyik. Amma digər meydançaların inşasından sonra. Düşünürəm ki, digər klublar da bu imkanlardan faydalanacaqlar".

“Yox, komanda Tovuzda oyundan-oyuna görünməyəcək. Haqlı olaraq belə sualınız ola bilər ki, meydançanı burada salmaqdansa, Tovuzda niyə salmadıq? Elə deyil. Oradakı əsas meydançanın ot örtüyü sünidi, bütün yaş qruplarından ibarət komandalarımız məşq edir. Tovuzdakı meydançanı dəyişsək, artıq yaş qruplarından ibarət komandaları ora buraxa bilməyəcəyik. Bir neçəsi lazımdı ki, buna da şirkətin maddi gücü imkan vermir. Amma yay aylarından etibarən həmin infrastruktur layihələrə başlayacağıq. Layihə bitdikdən sonra tamamilə orada olacağıq. İndi Tovuza gedib-gəlirik. Növbəti mövsümdən premyer-liqaya üç bölgə klubu da əlavə olunacaq, bu da bizim Bakıda daha az vaxt keçirməyimizə səbəb olacaq. Mərhələli addımlarla bu işləri görməyə çalışacağıq”.

“Bu işlər şəxsi vəsaitimiz hesabına baş tutacaq. Vaxtımız yoxdu. AFFA-nın strateji planından sonra görəcəyi işlər çoxdu. Əvəllər federasiyaya belə müraciətimiz vardı. Amma strateji plandan sonra başa düşdük və belə qərara gəldik ki, daxili imkanlar hesabına bu işləri görməliyik”.

“Akademiyada 500-dək uşaq hazırda məşq edir. Onlardan təqribən 50-ni klubun bazasında saxlayırıq. Amma Ağstafa, Tovuzun bir neçə kəndində futbol akademiyaları açmışıq, fəaliyyətə başlayıblar. Biz özümüzü tək Tovuzun deyil, qərb bölgəsinin komandası kimi görürük. Nəinki qərbin, bütün Azərbaycanın komandasıyıq. Ona görə də xalqın komandası addım-addım o mərhələyə gələcək”.