Yeni mövsümdə də iddialı olacağı gözlənilən “TuranTovuz” bu gün azarkeşlərinə müraciət edib. “Football-plus.az” xəbər verir ki, klub artıq yeni bilet sisteminə keçir: “Yeni mövsümdən etibarən stadionumuzda elektron bilet sisteminə keçirik. Bu yenilik stadionumuzun UEFA standartlarının tələblərinə uyğunlaşdırılması məqsədi daşıyır. Birbilet.az ilə əməkdaşlığımız çərçivəsində azarkeşlərimiz artıq kassaya gəlmədən biletləri onlayn şəkildə əldə edə biləcəklər.
Qeyd edək ki, mövsümlük bilet əldə etməklə stadionda özünüz üçün ən ideal yeri seçə və mövsüm boyu bütün oyunları eyni yerdən izləyə bilərsiniz.
Şəhid ailələri və qazilərimiz onlar üçün ayrılmış sektora dəvətnamələri stadionumuzun kassasından ödənişsiz əldə edə bilərlər.
Elektron bilet almaqda çətinlik çəkən azarkeşlərimiz isə biletləri stadionun kassasından fiziki şəkildə əldə edə biləcəklər.
Qeyd edək ki, stadiona giriş yalnız fiziki və ya onlayn biletin üzərində olan QR kodu oxutmaqla mümkün olacaq.
Mövsümün ilk oyunu üçün biletlər sabah saat 11.:00-dan satışa çıxarılacaq. Biletini al, komandana dəstək ol”.