“Şükür Allaha, sağ-salamat İrəvana çatmışıq. Özümü yaxşı hiss edirəm. İndi oteldəyik. Yol yorğunluğundan xilas olmağa çalışırıq. Bir azdan oyunöncəsi son məşqimizi edəcəyik. Bura baş verə biləcək bütün hadisələrə psixoloji cəhətdən hazırlıqlı gəlmişəm. Hələ ki təhlükəli vəziyyətlə üzləşməmişəm. Sadəcə, hava limanında yüngülvari yubatmalarla qarşılaşdım. Sənədlərin qaydasında olub-olmadığını yoxlayan şəxs məni gecikdirməyə çalışırdı. Lakin sənədlərim qaydasında olduğuna görə böyük problemlə üzləşmədim. Daha sonra mənə təlimatlar verildi. Hərçənd buna ehtiyac yox idi. Dedilər ki, təxribatlara qarşı ehtiyatlı ol və sosial şəbəkələrdə paylaşım edərkən bəzi təhlükəsizlik qaydalarına riayət et. Əlavə olaraq, azərbaycanlı kimi Ermənistana niyə gəldiyimi, qorxub-qorxmadığımı soruşdular. Qorxacaq bir şeyin olmadığını, İrəvana futbolçu kimi, sadəcə, meydana çıxmağa və qol vurmağa gəldiyimi dedim. Bildirdim ki, burda Albaniya ilə yanaşı, Azərbaycanı da təmsil edirəm. Digər tərəfdən, həm Albaniya Futbol Federasiyası, həm də UEFA tərəfindən Ermənistana bütün təhlükəsizlik tədbirlərinin yerinə yetirilməsi yönündə xəbərdarlıq edilib. Bu baxımdan da heç bir problem yoxdu. Hər addımımı mühafizəçilərlə birgə atıram. Həm oteldə, həm də kənarda məni qoruyurlar. Tərəfdarlarıma demək istəyirəm ki, narahat olmasınlar. İnşallah, layiqli qələbə qazanıb Albaniyaya dönəcəyik. Özümü tam hazır hiss edirəm. İndiyə qədər bütün məşq proseslərində iştirak etmişəm. Formamı bərpa etdiyimi düşünürəm”.