“Qarabağ” srağagün daha bir futbolçu ilə anlaşacağı haqda anons yaydı. Bəs, söhbət kimdən gedir?

“Football-plus.az” “Transfermarkt”a istinadla xəbər verir ki, “köhlən atlar” heyətini Samuel Lobate ilə gücləndirəcək. Düzdü, onun hələ icarəyə götürüləcəyi, yoxsa birdəfəlik transfer olunacağı dəqiq deyil, ancaq iddialara inansaq, artıq Bakıdadı. Hətta tibbi müayinədən də keçib və yaxın saatlarda klubla müqaviləyə qol çəkəcək.

Lobate kimdi?

O, Portuqaliyanın 2-ci liqasında çıxış edən “Portimonense”nin futbolçusudu. 24 yaşlı orta sahə oyunçusu 184 sm boya malikdi. Lobate Portuqaliyanın U-17 millisinin də formasını geyib. “Boavişta”nın yetirməsi olan yarımmüdafiəçi “Famalikao”, “Belenenseş” və “Tondela”da çıxış edib. Samuelin “Transfermarkt”dakı bazar dəyəri 300 min avrodu. Onun “Portimonense” ilə müqaviləsinin müddəti 2028-ci ilin yayında başa çatacaq.

Lobate 2025/26 mövsümündə ölkə kubokunda 1, çempionatda isə 29 matçda (23-də start heyətində) tər töküb. “Futbol ili” ərzində 2204 dəqiqə meydanda olub və bu müddətdə 2 qol, 1 məhsuldar ötürməyə imza atıb, 9 sarı vərəqə alıb.

Xatırladaq ki, “Qarabağ” mövsümlərarası fasilədə artıq Zakaria Savo və Jali Muaddiblə güclənib.

KƏNAN BAHADIR