Bu gün İrəvanda ağırlıqaldırma üzrə Avropa çempionatına start veriləcək. Yarışa qatılacaq təmsilçilərimizin siyahısını diqqətinizə çatdırmışdıq.

Nümayəndə heyəti aprelin 13-də İrəvana çatıb. Bu haqda yerli jurnalistlərə yarışa hazırlıq üzrə Təşkilat Komitəsinin sədri Araik Arutyunyan məlumat verib. O bildirib ki, İrəvana 12 nəfərlə gələn nümayəndə heyəti təhlükəsizlik baxımından açılış mərasiminə qatılmayacaq.

"Sputnik Armenia" iddia edir ki, Azərbaycan nümayəndə heyətini “Zvartnots” hava limanında gücləndirilmiş polis dəstəsi qarşılayıb, xüsusi təyinatlılar da iş başında olub.

...Və dünən axşam saatlarında keçirilən açılış mərasimində dünya idman tarixində bəlkə də indiyə qədər görünməyən bir rəzalət yaşandı: Azərbaycanın ay-ulduzlu, üçrəngli bayrağı yandırıldı!

Bayrağımız Karen Dəmirçiyan adına İdman-Konsert Kompleksində görünəndə dolu tribunalar fit çaldı. Elə həmin vaxt salondakılardan biri – Aram Nikolyan ad-soyadlı dizayner səhnəyə qaçaraq Azərbaycan bayrağını tutan qızın əlindən onu götürərək yandırdı və salondan çıxardı. Erməni azarkeşlər Türkiyə bayrağını da fitə basdı.

Belə gərgin mənəvi-psixoloji mühitdə çıxış edəcək idmançılarımızdan hansısa uğur gözləməyə dəyməz.

Ümumiyyətlə, Ermənistana getməyin mənası nə idi?!

HUŞƏNG