DÇ-2026 tam sürətlə davam edir. 5-ci oyun günü sürprizlərlə bol oldu. Favoritlərdən heç kim qələbə qazana bilmədi.

"Football-plus.az" xəbər verir ki, xüsusilə son Avropa Çempionu İspaniyanın Kabo Verde ilə qolsuz bərabərə qalmasını hələ ki, turnirin ən böyük sensasiyası adlandırmaq olar. İlk qolsuz görüş bu mundialın 13-cü oyununa təsadüf etdi. Ümumiyyətlə, İspaniyanın dünya çempionatlarına uğursuz başlaması yavaş-yavaş ənənəyə çevrilir. ''Buğalar'' son 5 mundialın yalnız 1-nə qələbə ilə start veriblər (1 heç-heçə, 3 məğlubiyyət).

Daha bir maraqlı fakt odu ki, XXI əsrdə Avropa çempionu statusunda olan yığmaların heç biri (!) mundiallara qələbə ilə start verə bilməyib. Bu uğursuzluğu DÇ-2022-də İtaliya, DÇ-2018-də Portuqaliya, DÇ-2014 və DÇ-2010-da İspaniya, DÇ-2002-də isə Fransa yaşayıb. AÇ-2004-ün qalibi Yunanıstan DÇ-2006-ya ümumiyyətlə vəsiqə qazana bilməyib. Son 17 DÇ matçında ispanların cəmi 5 qələbəsinin olması diqqət çəkir.

Maraqlıdı ki, bu turnirdə Avropa komandaları o qədər də inamlı təsir bağışlamır. İndiyə qədər 10 Avropa komandasından yalnız 3-ü - Almaniya, İsveç və Şotlandiya qələbə qazanıb (5 heç-heçə, 2 məğlubiyyət). İspaniya - Kabo Verde matçında DÇ tarixinə düşən birdən-birə iki maraqlı fakt ortaya çıxdı. Kabo Verde topa cəmi 26 faiz sahib olmasına baxmayaraq oyunu 1 (!) qayda pozuntusu ilə tamamladı. Müvafiq statistikanın aparılmağa başlandığı 1966-dan bu yana DÇ-də heç bir komanda 90 dəqiqə ərzində bu qədər az qayda pozuntusuna yol verməmişdi.

Digər unikal hadisə isə odu ki, İspaniyanın forvardı Mikel Oyarsabal ilk 30 dəqiqədə topa toxuna bilmədi. Yenə də 1966-dan bu yana mundiallarda belə hadisəyə təsadüf edilməmişdi. Matçın qəhrəmanı isə Kabo Verdenin qapıçısı Vozinya oldu. Portuqaliyanın 2-ci divizion təmsilçisi ''Çaveş''də forma geyən 40 yaşlı qapıçı mundialda debüt oyununda 7 seyvlə yadda qaldı.

Matçın ən yaxşısı seçilən Vozinya bir andaca sosial şəbəkələrdə fenomenə çevrildi. Oyundan öncə onun ''instaqram''ında cəmi 50 min təqibçi var idisə, hazırda bu rəqəm 6 milyonu (!) ötüb.

Maraq üçün bildirək ki, Kabo Verdenin cəmi yarım milyon əhalisi var.