Nəhayət, dünən ölkəmizi avrokuboklarda təmsil edəcək bütün komandaların adına aydınlıq gəldi. Məlum oldu ki, CAS UEFA-nın qərarıyla Konfrans Liqasından uzaqlaşdırılan “Turan Tovuz”un şikayətini təmin etməyib. Bu üzdən həmin turnirdə “Zirə” çıxış edəcək.

Bəs, hazırda komandalar nə işlə məşğuldu?

Çempionlar Liqasında çıxış edəcək “Sabah” hələ hazırlığa başlamayıb. Valdas Dambrauskasın çalışdırdığı komanda yeni mövsümün hazırlığına sabah start verəcək. Astriyanın Tirol bölgəsində baş tutacaq toplanış iyulun 3-dək davam edəcək. Hazırlıq çərçivəsində 3 yoxlama oyununun keçirilməsi nəzərdə tutulub. “Bayquşlar” Eyden Makkarti, Yunis Laçab və Junior Erivaldo Almeyda ilə güclənib. Cesse Sekidika, Pavol Şafranko, Nicat Mehbalıyev və Amin Seydiyev isə yola salınıb.

Avropa Liqasında çıxış edəcək “Qarabağ” hazırlığa iyunun 10-da başlayıb. Bakıdakı toplanış iyunun 22-dək davam edəcək. “Köhlən atlar” da Tirolda olacaq. Burdakı toplanış iyulun 2-də başa çatacaq. Ağdamlılar üç yoxlama oyunu keçirməyi nəzərdə tutub. Rəqiblər 27-də saat 19.00-da Sofiya ÇSKA-sı, iyulun 1-də saat 15.00-da Ukrayna “Metallist”i, saat 20.00-da isə Macarıstan “Ferentsvaroş”u olacaq. Mövsümlərarası fasilədə Zakaria Savo və Jali Muaddiblə güclənən “Qarabağ”ın Toral Bayramov, Emmanuel Addai, Ramil Şeydayev və Sami Mmae ilə vidalaşdığını da xatırladaq.

Konfrans Liqasındakı təmsilçilərimizin - “Neftçi” ilə “Zirə”nin təlim-məşq toplanışlarıyla bağlı hələ ki xəbər yoxdu. Bu barədə “Football-plus.az”a klubların mətbuat xidmətindən məlumat verilib.

Bu yay Rüfət Abbasovu transfer edən “ağ-qaralar” Vensan Abubakar, Edvin Kuç, Kristian Kostin və Murad Məmmədovla yolları ayırıb. Amin Seydiyevi heyətinə cəlb edən “qartallar” isə Ceyhun Nuriyev, Stefan Aka, Eldar Quliyev, Leroy Mikels, Rüfət Abdullazadə, Tyaqo Silva və Anatoli Nuriyevlə sağollaşıb.

KƏNAN BAHADIR